Patna, Naitung:
Kum ka jingpynïakynduh jingeh ïa ka Jan Suraaj Party (JSP) hashwa ka jingthep vote sha ka Ïingdorbar Thawaiñ jong ka Bankipur, katto katne ngut ki heh nongïalam bad ki nongbud jong ka, ki la pynïasoh ïalade bad ka Bharatiya Janata Party (BJP) ha ka sngi Balang ha ka jingïalang pynrung kyrteng ha ka ophis jong ka BJP ha Patna, ong ka tyllong khubor.
U president ka BJP ka Bihar, u Sanjay Saraogi, u la pynrung thikna ïa kitei ki dkhot ba thymmai sha katei ka seng.
Napdeng kine kiba la pynïasoh sha ka BJP ki long u kyrtong barim ka Digha u Bittu Singh, ka Vineeta Bittu ka kyrtong Mayor, u KC Sinha u kyrtong jong ka Kumhrar bad u Gopal Singh u kyrtong jong ka Maner. Kiba bun ki nongbud jong ka Jan Suraaj ki ïasoh bad kane ka seng.
“Bun ki nongïalam jong ka Jan Suraj ki la pynïasoh sha ka seng, da kaba ïoh mynsiem na ki polisi treikam jong ka BJP bad ka jingïalam jong u Myntri Rangbahduh ka ri u Narendra Modi. Baroh ki dkhot ba thymmai kin trei ban pynkhlaiñ shuh shuh ïa ka seng, bad ka longïing ka BJP ka pdiang sngewbha ïa ki,” u la ong.
Haba pdiang sngewbha ïa ki nongwan rung thymmai, u Saraogi u la ong ba ki la ïoh mynsiem na ki buit treikam jong ka BJP bad na ka jingïalam jong u Myntri Rangbahduh ka ri u Narendra Modi.
“Ngan ym iehnoh ïa ka BJP mynta; ngan im bad ïap hangne,” u la ong, da kaba pynpaw ïa ka jingngeit ha ka rukom pyrkhat bad jinglong nongïalam jong ka BJP bad kular ban trei da ka jingaiti lut.
Haba shim ïa ka jingkynthoh ïa u nongseng jong ka Jan Suraaj, u Prashant Kishor, u Gopal Singh, u la kynnoh ba katei ka seng, ka duna ka jingbthah.
“Kam don kano kano ka jingthmu hangta. U briew uba sngew sarong um lah ban pynïaid ïa ka seng,” u la ong, da kaba batai ïa ka BJP kum ka seng kaba khlaiñ bad kular ban trei ban pynkhlaiñ ïa ka.
Haba kynthoh halor ka jingpynrung kyrteng, ka BJP jong ka Bihar ka la ong ha ka rynsan X, “Kane ka jingïasoh kaba heh jong ka seng ka pyni ïa ka jingkut jingmut jong ka sorkar NDA ban tei ïa ka Bihar kaba roi bad ka India kaba la roi. Ka jingpdiang sngewbha bad ka jingkhublei sha baroh ki nongmihkhmat paidbah ba donburom kiba la pynïasoh bad ka longïing BJP.”
Katkum ka khubor ba la ïohlum, la ong ba kane ka jingjia ka wan hashwa ka elekshon shiteng samoi sha ka Ïingdorbar Thawaiñ jong ka Bankipur kaba don ka jingma kaba khraw ha ka 30 tarik, Naitung, ha kaba u nongseng jong ka Jan Suraaj, u Prashant Kishor, un ïakhun pyrshah ïa u kyrtong ka BJP, u Neeraj Kumar Sinha.
U Kishor u thmu ban pynkut noh ïa ka jingjop jong ka BJP ha katei ka konstitwensi.
Kane ka shuki ka la thylli noh hadien ba u MLA jong ka BJP uba la trei saw sien u Nitin Nabin u la shah jied sha Rajya Sabha, kaba la pynlong ïa ka jingthep vote shiteng samoi.
