Shillong, Naitung 18
Ka Executive Committee jong ka Khasi Hills Autonomous District Council (KHADC) ka la buhteng shwa ïa ka rai ban pynlong ïa ka shnong Majai kum ka Raid hapoh ka Hima Sohra bad ki khun ki hajar ki la kmen bad ki ong ba ka dei ka jingjop.
Ka kynhun jong ki khun ki hajar ka Hima Sohra ki la leit ban ïakynduh ïa u Deputy Chief Executive Member (Dy CEM), u Bah PN Syiem ha ka Sngi Palei bad u la ai sha ki ïa ka hukum jong ka KHADC kaba la batai ba la buhteng shwa ban pynlong Raid ïa ka shnong Majai.
Haba kren sha ki lad pathai khubor, uwei na kiba mihkhmat lang ïa ki khun ki hajar ka Hima Sohra u Bah Milkyway Bynnud u la ong ba ha ka jingïakynduh bad u Dy CEM la ïohpdiang ïa ka rai jong ka KHADC kaba la pynbna ba la buhteng shwa ïa ka rai ban pynlong ïa ka shnong Majai kum ka Raid.
Kane ka rai jong ka KHADC ban buhteng ka la wan hadien ba la mih ka jingpyrshah na ka Hima Sohra ban ithuh ïa ka shnong Majai kum ka Raid.
U Bah Bynnud u la ong ba kane ka rai kaba la pynmih da ka KHADC ka long ka jingjop ïa ki khun ki hajar bad ïa ka Hima Sohra namar ba la buhteng ïa ka jingpynbna kaba la pynmih ha ka 24 tarik u Jylliew, 2024 ban pynlong ïa ka Majai kum ka Raid.
Ha ka jingshisha, ka KHADC ka la rai ban pynlong ïa ka Majai kum ka Raid bad hap hapoh ka jingpeit jingkhmih hi jong ka Hima Sohra.
Dang shen u CEM ka KHADC, u Bah Pynïaid Sing Syiem u la ong ba ka jingpynlong ïa ka Majai kum ka Raid ka long katkum ka rukom long ki kyndon synshar Khasi kaba sdang na ka Hima, bud sa ka Raid bad ki shnong.
U CEM u la ong ruh ka jingpynlong Raid ïa ka shnong Majai ka long ban nang pynkhlaiñ shuh shuh ïa ka Hima Sohra bad ban khmih ïa ka rukom treikam.
Hynrei na ka liang ka Hima Sohra ka la kynnoh ba kane ka dei ka jingleh lyndet namar ym shym la don ka jingïasyllok hapdeng ka KHADC bad ka Hima Sohra ha kaba ïadei bad ka jingpynlong Raid ïa ka shnong Majai.
La kynnoh ruh ba ka jingpynlong Raid ïa ka Majai ka long kum ka jingaibor ïa ki bym dei Khasi namar kiba dei ki trai muluk ki don tang kumba 10 na ka 100 ha Majai.
