Shillong, Naitung 18
U Myntri ka tnat Jngohkai Pyrthei (Tourism) ka Sorkar Jylla, Bah Paul Lyngdoh, u la ong ba ïa ka kam ban pyntrei na ka bynta ka projek Ropeway dei ban sdang noh ha u bnai Risaw mynta u snem.
Haba kren sha ki lad pathai khubor ha ka Sngi Palei, u Bah Paul u la ong, kane ka projek ka dei kaba donkam khamtam lei ha ka ban khring ïa ki nongjngohkai pyrthei. Kumta ka sorkar ka kwah ban pynthikna ba ka jingpyntrei ïa ka projek Ropeway ha jylla Meghalaya ruh kan long kaba kynsai kum kiba don ha kiwei ki ri ka pyrthei.
Shuh shuh, na ka liang u Myntri u la ong ka jingplie paidbah ban buh mawnongrim la dep ban leh da ka President jong ka Ri India bad namar ba ka jinglong ka suiñ bneng kam pat ailad, kumta la buh ba ka jingtrei ka dei ban sdang noh ha u bnai Risaw.
“Ngi dang don mynta ha ka bynta kaba khatduh ban pynmih ïa ka jingpynbeit thymmai, hynrei kumba phi tip ka aïom trei hangne ka sdang hadien ba la dep ka aïom lyiur. Kumta ka thong jong ngi, ka long ba ha kaba sdang jong u bnai Lber, ngi dei ban lah ban ïohi ba ka projek kan sdang noh shaid-shaid,” la ong u Bah Paul.
