Nongpoh, Naitung 13:
Ka jingpynbeit thymmai kyrpang ïa ka Electoral Roll ne ka Special Intensive Revision (SIR) ka dang ïaid shakhmat ha Ri-Bhoi District, bad haduh ka 10 tarik Naitung, 2026, ki bor pynïaid ilektion ki la sam haduh 1,47,985 tylli ki Enumeration Form (EF) sha ki paidbah, kaba long 71.93% na ka jingdon ki nongthep vote baroh kiba don hok hapoh ka district. Katkum ka kyrwoh ba la pyllait da ka shlem treikam u Deputy Commissioner-cum-District Election Officer, Ri Bhoi, ka jingïaid shaphrang jong ka jingsam ïa ki Enumeration Form katkum ki constituency ka long: Mawhati – 83.61%, Nongpoh – 82.26%, Umsning – 71.52%, Umroi – 63.30%, bad Jirang – 58.33%. Ban pynsngewthuh paidbah bad ban ïoh ka jingïatreilang na ki paidbah, u District Election Officer dang shen u la pynlong ruh ïa ka jingïalang bad ka Synjuk Ki Rangbah Shnong Ri Bhoi District, ha kaba la pynshai ïa ka jingthmu, ki rukom pyntreikam bad ka jingdonkam jong ka Special Intensive Revision. Ha kajuh ka por, u la kyrpad ruh ïa ki Rangbah Shnong ba kin ai ka jingïatreilang kaba pura bad ki Booth Level Officers (BLO) ban pynlong ïa kane ka kam kaba jop. Shuh shuh, ban pynsuk ïa ka jingïaid beit ïaid ryntih jong ka SIR, u District Election Officer u la buh ruh ïa ka SIR Help Desk ha ophis u Deputy Commissioner, Ri Bhoi District. Kane ka rynsan ka long ban ai jingïarap ïa ki Booth Level Officers bad ki paidbah kiba kwah wad jingtip khambha lane don ki jingkylli halor ka Special Intensive Revision. Na ka liang u District Election Officer u la kyrpad ïa baroh ki nongthep vote kiba don hok ba kin shim bynta shitrhem ha kane ka Special Intensive Revision da kaba ai ïa ka jingïatreilang bad ki Booth Level Officers bad ban pyndep noh ïa ka jingpynrung kyrteng bad aiti ïa ki Enumeration Form hapoh ka por ba la buh. Ki paidbah kiba donkam jingïarap ne ki jingtip ba kham bniah halor kane ka bynta ki lah ban phone sha ka SIR Help Desk ha u nombor 9863985792.
