Shillong, Naitung 13:
Ka Khasi Students’ Union (KSU) ka la byrngem ban pynlong da ka jingïakhih, lada ka North Eastern Indira Gandhi Regional Institute of Health & Medical Sciences (NEIGRIHMS) ka pynïaid shakhmat khlem ka jingpynbeit haba ïadei ka jingdawa thungkam ïa ka bhah ki riewlum bad ki nongtrei shynrang bad kynthei. U Samla Reuben Najiar uba long u General Secretary ka KSU ha ka lah sngi u Blei u la ïathuh ba ka seng ka la aiti ïa ka shithi pynkynmaw sha u Director ka NEIGRIHMS halor ka jingïamynjur lang kaba la shim ha ka 5 tarik Jymmang 2025, hadien ka jingïakhih da kaba shong kyllaiñ mungor ba san sngi. “Hadien ka jingïalang ba la lamkhmat da u Myntri barim ka Sorkar Bah Paul Lyngdoh bad ki Heh Ophisar na NEIGRIHMS, ka Sorkar Jylla ka la shim ïa ka rai ba ka NEIGRIHMS kan nym pynïaid shakhmat ïa ka jingthungkam tad haduh ban da lah pynbeit ïa kine ki kam” la ong u samla Reuben. U la kynnoh ba wat hapdeng ka jingkular ban pynbeit ïa kane ka kam hapoh ka shibnai bad ban phah ïa ka sha ka Ministry, “Ka la ïaid la palat shisnem mynta, ym shym la leh eiei halor kane ka kam” Ka KSU ka la ong ba kam kwah ban khang slem ïa ka jingthungkam haba khmih ïa ka jingnang bun ki nongpang, hynrei ka la kynnoh ïa ka Sorkar namar ka “jingkular thok”. “Kum ka seng, ngim kwah ban pynsangeh ïa ka jingthungkam ha NEIGRIHMS namar ngi sngewthuh ba da ka jingnang bun ki nongpang, ka long kaba donkam ruh ban don kham bun ki nos” u la ong. Ka Seng ka la kam ba ka la ïoh jingtip ba u Director ka NEIGRIHMS un sa rah ïa ka jingtyrwa thungkam sha ka Governing Council khlem da pynrung ïa ki jingai jingmut jong ka KSU. “Lada ki pynïaid shakhmat ïa ka jingthungkam kumba ka long, ngin sa ïohi ïa kham bun ki nos shynrang ki ban wan ha NEIGRIHMS, baroh ki kam ba la mang sha ki riewlum yn sa knieh noh da ki briew kiba wan na shabar ka Jylla” u la ong. Ha ka shithi sha u Director, ka KSU ka la pynpaw ba kan nym ailad ïa ka jingïalang jong ka Governing Council tad haduh ban da pynbeit ïa ki jingdawa ka Seng.
