Shillong, Naitung 13:
Hadien 37 snem ka jingap khmih lynti, ki nongshong shnong ka Shillong Cantonment kin sa hap noh hapoh ka jingtreikam ka Building Bye-Law, ong u Myntri Sorkar Bah Sanbor Shullai ha ka sngi Nyngkong. Ha ka kyrwoh, u Bah Sanbor u la pynpaw ïa ka jingsngewhun halor kane ka jinglong jingman bad kynnoh ïa ka jingpynslem sha ka notification u snem 1989 bala pynmih da ka Sorkar Congress.
“Ki nongshong shnong ka Shillong Cantonment ki lah ban shah pynhap noh hapoh ki kyndon treikam jong ka Building Bye-Laws hadien ka jingap ba 37 snem. Ha u snem 1989, ka Sorkar Congress kala pynmih ïa ka jingpynbna ba ka F.S.I floor space index ka long 0.5 bad naduh katei ka por, ki nongshong shnong kila mad ïa ka jingjynjar,” ong u Bah Sanbor, U la ai burom ïa kane ka jingïaid shakhmat ka kam sha ka jingpyrshang ba khlem sangeh jong ka Shillong Cantonment Board bad ki ophisar ka Jylla. “Nga ai khublei ïa u President ka Shillong Cantonment Board Rajesh Verma, u CEO barim ka Board Ayush Maurya, u Ward Member Bipen Pradhan, Engineer na ka Cantonment Board bad MUDA namar ka jingpyrshang khlem sangeh ban pyntreikam ïa ka bye-law,” u la pynpaw. U Bah Sanbor, uba la leit ïashimbynta ha ka jingïalang ka Board kum u dkhot ba shah khot sngewbha, u la ïathuh ba ka jingïalang kala ïatai bniah bha ban weng ïa ki jingeh kiba don hakhmat. “Kum u dkhot ba shah khot sngewbha jong ka Board, Nga la ïashimbynta ha bun tylli ki jingïalang jong ka Cantonment Board. Don ki por ba ki jingïalang ki neh palat ïa ka phra kynta khnang ban pynthikna ba kan nym don ka jingïatakhuh kam bad ka Sorkar,” u la ong. U la ai jingïaroh ruh ïa ka jingleit buddien jong ki nongtrei ka Sorkar sha New Delhi dang shen. Katkum ka jingong jong u, ïa ka draft building bye-law la pynmih ha ka Gazette notification ba 3 tarik Naitung, 2026 da ka Ministry of Defence. Ka notification ka khot sngewbha ïa ki jingai jingmut bad ki jingpyrshah hapoh ka 30 sngi. Ban pynkloi ïa ka jingai jingmut u paidbah, u Myntri u la ïathuh ba un sa lum ïa ka jingïalang bad ki nongshongwai ha ki sngi ban wan khnang ba yn lah ban phah ïa ki jingai jingmut jong ki sha ka Ministry hashwa ka 3 tarik Nailar.
