Shillong, Naitung 13:
Ki pulit kila register ïa ka case hapoh ka POCSO Act pyrshah ïa u Nos ka North Eastern Indira Gandhi Regional Institute of Health & Medical Sciences (NEIGRIHMS) halor ka jingkynnoh ba u leh kynshlein ïa kawei ka nongpang ba dang khynnah bad kular ban sa pyndep ïa ka charge-sheet hapoh ka 60 sngi. U Superintendent of Police ka East Khasi Hills Bah Vivek Syiem, hadien ka jingïakynduh bad ki Nongïalam ka KSU, u la ong ba ka tnad Pulit kala bud ïa ki lynti treikam katkum ka ain. U SP u la ong, “Ki Pulit kila pynngat ïa ka case hapoh ka POCSO Act. Ngi dang bishar ïa ka case. Ngi la dep phah ïa ka notice. Ïa ka jingbatai da ka jingthoh, yn sa pyndep lashai ka sngi ha ïingkashari, bad yn sa pynlong ruh ïa kiwei pat ki sienjam jong ka jingtohkit.” U la ïathuh “Kane ka case ka kynthup ïa i khynnah bad ka donkam ban hap ai notice hapoh ka kyndon 33 jong ka BNSS” haba pyntip ba ïa ka kaiphod yn sa phah sha ki bor khmih ka NEIGRIHMS ba kin leh eiei pyrshah ïa une u nongshah kynnoh. “Ka shong ha ki ba kin shim rai ïa kaei kaba dei ban leh ïa une u nongshah kynnoh. Watla katta, ka jingtohkit kan ïaid ka bym shah liang,” u la ong. U Bah Vivek u la ïathuh “Ïa kane ka case la shim kum ka Special Report Case, bad hapoh ka 60 sngi ngin sa aiti ïa ka charge-sheet kaba shong katkum ki sakhi ba ngi ïoh lum”.
