Shillong, Naitung 13:
U Samla Mewario Dkhar, uba la don 32 snem ka rta, uba dei na Nartiang, u la jah bad khlem wanphai ïing shuh naduh ba jia aksiden kali ha Sonapur, Assam myn ha ka 03 tarik u Naitung 2026, kaba une u Samla u la ñiah ïa ka trok bad uba don ruh ha ka kynhun jong ka MCTODA. Haba ïadei bad kane ka jingjia, na ka liang u Bah Treilem Shylla, u kpa jong une u Samla bad ki nongïalam ka Meghalaya Commerical Truck Owner and Driver Association (MCTODA), ki la mih shakhmat ban pyntip bad batai kham bniah halor ki jingjia. U Bah Treilem (kpa u Samla Mewario) u la ïathuh, ba u khun jong u, u la aksiden ha ka step jong ka 03 tarik u Naitung 2026, ha Sonapur, ha kaba u la mynsaw na ki bynta jong ka durkhmat bad ki bor pulit ka Assam ki la pynkit mar-mar sha GMC Hospital Guwahati ban ai jingïarap. Da kaba pyntip ba na ka liang ki bahaïing kim shym la ïoh jingtip ha katei ka sngi ba aksiden, hynrei lyngba ka jingïohi ha ka kor CCTV ha ki sngi ba bud, u kpa jong u Samla Mewario u ïathuh ba u la mih na katei ka jaka sumar marwei khlem da synran da ki pulit, bad haduh mynta ruh um shym pat wan phai bad ym pat lap satia ba u don shaei. Kumta u kpa u la kyrpad ïa u Mewario ba un sngewbha ban wan phai noh lada u don shabar jylla ne don sha ka Jylla lajong ruh, da kaba pyntip ba ym shym pynngat case ïa u halor kane ka jingjia. “Lehse u tieng ban wan phai sha ïing namar ka jingjia aksiden. Ym shym la pynngat ha kano-kano ka kyndon aiñ pyrshah ïa u halor kane ka jingjia,” la bynrap u kpa. Haba kylli, u kpa u la ong “Ngim shym don kano-kano ka jingsuba sniew haba ïadei bad ka jingjah jong u khun, hynrei kane baroh kadei ka jingbym ler kam ki pulit ka Assam, namar ki shu leit buh sha jaka sumar hynrei na jaka sumar pat u la mih marwei khlem ki nongsynran”. Shuh shuh u ong, ba ki la dep ban kylli bha na katei ka jaka sumar kaba don ha Guwahati, hynrei kim shym la lap ïa ka kyrteng jong u Mewario. Lah ban kdew ba ka jingjah jong u Samla Mewario ka la dap mynta la 1 taïew tam eiei naduh ka 3 tarik u Naitung 2026. Katkum ka dur CCTV kaba la ïohpdiang, la ïohi ba u Samla Mewario u la mih na katei ka jaka sumar khlem da phong slipar, bad u la ïaid dkoh marwei, u Mewario u phong da ka sopti rong ïong bad ka patlun lyngkot. Haba bynrap, na ka liang u President ka MCTODA, u Bah Mossklander Marngar u la ïathuh, ba ka kynhun ka la shimkhia ban wad ïa u Mewario naduh ba u la jah hynrei kim shym la tip satia ba shaei u don bad jah khlem wan phai shuh sha ïing. U Bah Mossklander Marngar u la pyntip ba na ka liang ka ïing ka sem ka la dep ban ujor da ka FIR halor kane ka jingjah u Samla Mewario, hynrei ki bor pulit haduh mynta kim shym la pat lap ne ïoh jingtip ei-ei.
