Dhaka, Naitung 18 (UNI)
Ka jingïap briew ha Bangladesh ka la kiew sha ka 12 ngut katba palat 150 ngut ki la mynsaw hadien ba la mih ka jingïakynad hapdeng ki nongïakhih bad ki pulit ha ka Sngi Palei.
Kane ka jingïakhih ka la sdang ha ka 1 tarik Naitung, bad haduh mynta, ka ïaid ka ïeng da ka rel ba pynïasoh ïa ka Dhaka bad kiwei pat ki bynta jong ka Ri Bangladesh ka dang shah ktah namar ka jingïakynad. Tang mynta ka sngi ruh, hynriew ngut ki briew ki la duh noh ïa la ka jingim.
Ki nongïakhih, ha kaba kiba bun ki dei ki samla pule, ki kwah ba ka sorkar kan pynkut noh ïa ka jingai bhah ba kyrpang na ka bynta ban ïoh rung kam sorkar ba kynthup ïa ka Civil Service. Kine ki nongïakhih ki la thang ïa ki bos bad kawei ka Television Station jong ka sorkar bad ha kajuh ka por, ki la pynthut ïa ka jingïaid jong ki Metro Rail. Na ka liang ka sorkar ka la tyrwa ban ïakren bad kine ki nongïakhih.
“Ka sorkar ka la mynjur ban ïakren bad kito kiba kwah ban pynthymmai ïa ka rukom ai bhah,” la ong u Myntri ka sorkar Bangladesh ba dei peit ïa ka tnat aiñ, u Anisul Huq haba kren sha ki lad pathai khubor.
Ki la don ki khubor halor ka jingïakynad kaba jur hapdeng ki nongïakhih bad ki pulit ha baroh kawei ka Ri kynthup ha nongbah Dhaka.
Ha ki katto-katne ki bynta jong ka Dhaka, ki surok ki la kynjah namar ka jingsheptieng hadien ba ki samla ki la pyntreikam da ka jingkhang dam naduh mynstep ha kylleng kane Ri. Ki jingïakynad ki la long ha kylleng kum ha ka thaiñ Dhanmondi jong ka Dhaka, Bahaddarhat ha nongbah Chattogram, Dinajpur, bad kiwei.
Ki samla pule ki la thang ruh ïa ka Bangladesh Television (BTV) Centre kaba don ha Rampura ha Dhaka.
Namar jong kane ka jingïakynad, ka sorkar ka la hap ban khang dam ïa ka Mobile Internet ha ka Ri baroh kawei, la ong u Zunaid Ahmed Palak, Myntri Khynnah ka tnat Telecom bad ICT. Ka jingïakhih ka la sdang ha ka 1 tarik Naitung hadien ba ki samla pule na ki skulbah ki la mih sha surok ban dawa na ka sorkar ba kan weng noh ïa ka jingai bhah ha ki kam sorkar.
Ha u bnai ba la lah, ka High Court ka la pynneh biang ïa ka kyndon kaba ai bhah 30 na ka 100 (30 per cent) ïa ki kam ba lait na ka bynta ki khun bad khun ksiew jong kito kiba la ïashim bynta ha ka jingïakhun ban pynïoh laitluid ïa ka Bangladesh ha u snem 1971.
Katkum ki khubor, kumba 56 na ka 100 jong ki kam sorkar la bhah na ka bynta ki nongshong shnong bapher-bapher ha Bangladesh kaba dei ruh ka Ri kaba mad ïa ka kyrduh kam kyrduh jam.
