Shillong, Naitung 18
U Myntri ka tnat Jngohkai Pyrthei ka jylla, Bah Paul Lyngdoh, u la ïathuh ba kan long kaba eh ban khang ïa ki kali tourist kiba dei na kiwei ki jylla ba kin rung sha kino-kino ki bynta.
U Bah Paul u la ong ba kan shem jingeh shi katdei eh namar hap ruh ban pyrkhat ba kito kiba ñiah ïa ki kali tourist ki dei kiba don ïa ka ‘National Permit’ ba ki lah ban rung sha kito ki jylla kaba ki la ïoh jingbit.
Ïa kane la pynpaw da u Bah Paul hadien ba la wai ka jingïalang kaba u la lum ha ka Sngi Palei bad ki ophisar ka tnat na ka bynta ban ïakren halor ka mat dawa ba la wanrah da ka All Khasi Meghalaya Tourist Taxi Association (AKMTTA) ban nym shah shuh ïa ki kali ba wan na shabar Jylla ba kin rung bad ïalam ïa ki nongwan kai shaduh ki jaka jngohkai bapher bapher kiba don ha kylleng ki bynta ka ri Khasi-Jaiñtia.
U Bah Paul u la ong ruh ba ka Sorkar kan hap ban pynthikna ba kino-kino ki lad ki lynti ba kan shim kim dei pat ban poi sha ka bym sngewtynnad, namar ym dei tang kiba na Assam kiba wan shane, hynrei wat kiba na Meghalaya ruh ki leit kai sha ki jaka jngohkai ha Assam, bad kam dei ban ktah ïa ka kam jngohkai ha ka jylla lada shim ïa kano-kano ka rai.
Shuh shuh u Myntri u la ong, “Ha ka jaka ba ngin phaikhmat sha ki jingeh kiba la buh hakhmat, ngi donkam ban pyrkhat kumno pat ban thaw ïa ki lad ki lynti, ban ïahun lang baroh namar yn nym lah ban khang ïa baroh ki jingkhang khamtam haba ki nongñiah kali na kane ka jylla kim lah ban pynbiang.”
Ha kawei pat ka liang, u la ïathuh ba u la dep ban bthah ïa ka tnat Transport ban ai jingtip halor ka jingdon jong ki kali, ki bos bad kiwei ki kali ML, bad hadien ba la ïoh ïa ka jingtip yn khot biang ïa kata ka jingïalang bad ki nongñiah kali tourist kynthup ki trai hotel bad home stay.
Haba ai nuksa, u Bah Paul u la ong ba lada ym don ki kali kiba biang, ki nongwan kai ki hap ban shim da kali kiba biang lut nadong-shadong.
Ha kaba ïadei bad ka jingdawa ka AKMTTA, u Myntri u la ong, ki jingdawa ki lah ban buh hynrei ka sorkar ka hap ban bishar pat haduh katno lah ban long kata ka jingdawa, khamtam lei ha kane ka juk kaba mynta, ha kaba ki nongwan kai kum na Delhi shwa ban mih na ka jylla lajong, ki la dep ban bat ne book online lypa ïa ki kali na Guwahati ban leit sha Meghalaya.
