Tura, Ïaïong 17
Ka jingïalang hapdeng u Myntri Rangbah ka Jylla, u Conrad K. Sangma bad ka A’chik Literary Society (ALS) ka la long ha ka Sngi Thohdieng ha Tura ban pynsngew sha ki dkhot halor ka rai jong ka Sorkar ban kynthup ïa ka Khasi bad Garo kum ki ‘Official Language’ jong ka Meghalaya ha ryngkat ka ktien Phareng.
Haba ïasam ïa ki jingtip ba bniah jong kane ka rai, u Myntri Rangbah u la pynpaw ba kane ka sienjam ka dei ka sienjam ka ban sah kynmaw ha ka histori ban ithuh bad kyntiew ïa ka pateng haba ïadei bad ki ktien jong ka Jylla.
U la kdew ba watla ïa ka rai la dep mynjur hashuwa hapoh Ïingdorbar Thawaiñ haba ïadei bad ka jingpynrung ïa ka Khasi bad Garo ha ka Khyrnit kaba 8 jong ka Riti Synshar ka Ri, ka la donkam ban phah ïa ka khubor kaba khlaiñ- sha ki paidbah ka Jylla bad ka Sorkar India kumjuh- halor ka jingdonkam ban kyntiew ïa ki ktien trai-ri ha baroh ki kyrdan.
“La bun-bun snem, ka la don ka jingdawa na ki paidbah ban pynrung noh ïa ka ktien Khasi bad Garo kum ki ‘Official Language’ jong ka Jylla, bad nga sngewkmen ban ïasam bad phi ba ïa kane ka rai la shim da ka Kynhun Myntri,” ong u Myntri Rangbah.
U la bynrap ba kane ka rai ka pyni ïa ka sienjam kaba khraw, bad katba ka jingpynïasoh pura ïa kine ki ktien haba ïadei bad ki jingpynïaid kam ka Sorkar, bad ki eksamin kan shim por, hynrei ki kam ki jam ki la ïaid shakhmat.
U la pyntip shuh-shuh ba ki jingpynïaid hapoh Ïingdorbar suki-suki kin sa kynthup ha ka ban pyndonkam ïa ka ktien Khasi bad Garo, da kaba kdew ba kan long kaba biang ba ki jingïatai ha ka ‘Autumn Session’ kin long ha kine ki ktien ha ka Ïingdorbar Thawaiñ bathymmai.
U Myntri Rangbah ka Jylla u la pan jingkyrshan ruh na ka ALS ban pynwandur ïa ki kyndon bad ki rukom treikam kiba donkam na bynta ka jingpyntreikam.
“Ngi donkam ïa ka jingkyrshan jong phi ban pyntikna ba ïa ka rai yn pyntreikam ha ka rukom kaba dei,” u la ong da kaba bynrap ba kane ka sienjam kan nang pynkhlaiñ shuh-shuh ïa ka mat ban pynrung ïa ka Khasi bad Garo ha ka Khyrnit ba 8.
Shuh shuh u la pynpaw ka jingsngewnguh ïa ki dkhot ALS na ka bynta ka jingpyrshang ba ïaineh jong ki ban pynneh-pynsah bad ban kyntiew ïa ka ktien Garo lyngba ki jingnoh synñiang bariewspah jong ki sha ka thoh ka tar, bad u la ïaroh ïa ka bynta jong ki ban pynurlong ïa une u mawmer ba kongsan.
Na ka liang ki dkhot jong ka Society ki la pdiang sngewbha ïa ka rai jong ka Sorkar bad pynpaw biang ïa ka jingkut jingmut jong ki ban bteng ha ka ban trei na ka bynta ban kyntiew bad pynroi ïa ka ktien Garo.
