Shillong, Naitung 18
Ka Executive Member (EM) ba khmih ïa ka tnat Information Technology (IT) jong ka Khasi Hills Autonomous District Council (KHADC) ka Kong Grace Mary Kharpuri ka la pynshai ba kam shym la don satia ka jingjah klep jong ki kor Computer ha KHADC.
Kane ka jingpynshai jong ka EM ka long halor ka jingmih ha kawei na ki lad pathai khubor kaba la ong ba ka la don ka jingjah klep jong ki kor computer na KHADC.
“Nga kwah ban pynshai hangne ba kam don satia kum kata, namar haba nga la pynshai hapoh ka ïingdorbar kaba dang shu dep jong ka KHADC, nga la ong ba nga khlem ïoh jingkheiñ hynrei ym dei ba jah klep ki computer,” la ong ka Kong Grace bad ong ruh ba kum ka EM ka sngewkhia ba kan mih kum kane ka kynti ba jah klep ki kor computer na KHADC.
“Ngam don eiei ban ong ne kwah ban pynjah burom ïano-ïano namar ba lehse kim pat lah ban ai jingkheiñ ha ka por ba biang, hynrei mynta ka kynti pat hadien ba la mih ka jingkylli hapoh ïingdorbar, ki la lah ban pynkloi ban ai jingkheiñ ïa ka jingdon ki kor computer,” la ong ka Kong Grace bad ka la ai khublei ruh ïa u ‘System Analyst’ ka tnat uba la lah ban pynbit pynbiang ïa ki jingkheiñ baroh.
Ka EM ka la pyntip ba haduh mynta ki kor computer kiba dang treikam ha KHADC ki don haduh 31 tylli bad kumba 12 tylli pat ki dei kiba la dep ban die lilam (auction).
