Shillong, Naitung 18
U Bah Paul Lyngdoh uba dei u Myntri bad ha kajuh ka por u nongaiktien jong ka Sorkar Jylla, u la kyrshan ïa ka jingong jong u Myntri Rangbah ka jylla u Conrad K Sangma ba kam don ka Work Permit hynrei ha ka aiñ ka don ka kyntien Registration.
U Bah Paul u la ong ba u kubur ïa kaei kaba la ong da u Myntri Rangbah ba kam don ka work permit bad ong ba ha kane ka aiñ, ka dei ka kyntien Registration tangba ka jingtreikam ka kyntien Registration kam pher na ka work permit.
U Bah Paul u la ong ba katkum ka kyntien registration kaba don, ki nongbylla nabar kim dei ban sah palat ïa ka 179 sngi bad man ka 179 sngi ki dei ban pynthymmai ïa ka jingbuh kyrteng lane kin hap ban mih na ka jylla.
Shuh shuh u la ong ba ka sorkar jylla ka la pynkylla ïa kane ka aiñ Inter-State Migrant Workmen (Regulation of Employment and Conditions of Service) Act, 1979 ha u snem 2011, ha ka por ba u dang bat kum u Myntri ka tnat Labour ha katei ka snem. U la ong ba ki seng ki khot ïa kane ka aiñ kum ka Work Permit hynrei kam don jingpher na ka kyntien ‘Registration’ namar ba ki nongbylla kim lah ban sah palat ïa ka sngi kaba la buh haba ki wan trei lymda ki pynthymmai ïa ka.
Ha kawei pat ka liang u Myntri u la ong, ka jingwan tur jong ki nongbylla ban wan trei ha kane ka jylla, ka dei namar ba ki trai shnong kim lah ban pyndap ïa ka jingdonkam ka kam bylla.
U la ong ba ka lah ban don ka jingduna kum ka jingduna nongtrei ka tnat Labour hynrei kum ïa kane ka jingeh, lah ban pynbeit. “Ka jingwan rung ki briew sha kane ka jylla ka don ar bynta, kawei kiba wan kum ki nongwankai kiban ai jingmyntoi ïa ki paidbah bad kawei kiba wan kum ki nongbylla bad, kam don satia kano kano ka jingkulmar jingmut halor kine ki ar tylli ki bynta,” la ong u Bah Paul.
