Shillong, Naitung 18
Hadien ba la mih ka jingïakhih kaba jur ha Bangladesh hapdeng ki samla pule bad ki bor pulit jong ka Bangla-desh, na ka liang ka sorkar Meghalaya ka la buddien bad ki bor pynïaid jong ka Bangladesh High Commission lem bad ka Indian High Commission, Land Port Authority, Dawki bad ka Exporters Association bad ka la shim ruh ïa ki sienjam na ka bynta ka jingshngaiñ ki samla jong ka jylla Meghalaya kiba pule ha Bangladesh.
Katkum ka khubor na ka sorkar ha ka Sngi Palei, la ong ba kumba ka long mynta ki la don haduh 202 ngut ki nong India, kiba kynthup ïa 67 ngut na Meghalaya, bad 131 ngut na kiwei pat ki jylla, kiba la rung sha Meghalaya lyngba ka Dawki, West Jaiñtia Hills.
Nalor jong kine ki nong India, ki don ruh sa 101 ngut ki nong Nepal bad 7 ngut ki nong Bhutan, kiba dei ki samla pule baroh, kiba la rung sha kane ka Ri lyngba ka Dawki.
Ka sorkar jylla ka la ong ruh ba la thung ïa u Bah Hiwot Rymbai, MPS, Additional SP ka West Jaiñtia Hills kum u Nodal Officer ha ki bynta jong ka thaiñ khappud ha ryngkat u Executive Officer, Land Port Authority Dawki kum U Assistant Nodal Officer ban peit halor ki briew na Meghalaya kiba dang don ha Bangladesh bad kiba kwah ban wanphai noh sha Ri lajong.
Nalor kane na ka liang ka sorkar jylla ka la pyntip paidbah ruh ba la buh ïa u Helpline Number khnang ki briew na Meghalaya kiba dang don ha Bangladesh ki lah ban phone ban ïoh jingïarap. Une u nombor u long 1800 345 3644 uba la pyntreikam mynta.
