Shillong, Naitung 18
Ha ka por mynstep jong ka Sngi Palei ka la don ka thma ktien kaba jur hapdeng ki nongshong shnong ka Muktapur bad ki shipai Border Security Force (BSF) hadien ba kine ki shipai ki la knieh ïa u shabi jong kawei ka kali.
Katkum ki dur-khih ba la don ha ki rynsan social media la ïohi ba ki nongshong shnong ki la mih sha surok ban pyni bor pyrshah ïa ki shipai BSF hadien ba ki la knieh ïa u shabi jong ka kali Bolero Pick-up. Ha kane ka por ka la mih ruh ka thma ktien kaba jur hapdeng ki arliang mamla.
Haba phai sha kane ka jingjia ha shnong Muktapur kaba la jia ha ka por kumba 10.45 ne 11 baje eiei mynstep, kawei ka kali kaba don ïa u nombor ML11-6112 kaba dei jong u Bah P Syndai, kaba dang wan phai na ïing jong ki bahaïing, ka la shah pynsangeh kyndit ha ki shipai BSF hapdeng surok ha shnong Muktapur bad ruh ban knieh wat ïa u shabi kali.
Hadien kane haba ki nongshong shnong ki la ïohi ïa kane ka jingleh donbor ki shipai BSF, ki la leit ban tur shajan, ha kaba ka la mih ka thma ktien kaba jur hapdeng ki paidbah bad ki BSF. Hynrei hadien katto katne por lyngba ka jingwan poi noh jong u heh ki shipai BSF la lah ban pynjai-jai noh ïa kane ka jingïapyni nia bad ruh ban pyllait noh ïa kane ka kali.
Katkum ki dur-khih, la ïohi ba ki nongshong shnong ki la ther tyngeh ïa ki BSF ba kim don hok ban pynsangeh kali hapdeng surok shnong bad khamtam lei ban knieh ïa u shabi, bad ki la ong ba ka kamram jong ki, ka dei ban leit shong sha khappud.
Na ka liang jong ki BSF ruh la ïohsngew ba ki la pyneh triang bad ong ba kin bat beit bad ba ka kali ka dei ban sangeh beit.
