Shillong, Naitung 18
U Myntri Rangbah ka Jylla u Conrad K Sangma u la khot ïa ki nongïalam ka Khasi Students’ Union (KSU) na ka bynta ban ïakren halor ki kam khynra mynder kaba la ïaid ha kylleng ki jaka jong ka rilum Khasi Jaiñtia.
Ha ka shithi khot ïakren ba la phah da ka Deputy Commissioner jong ka East Khasi Hills sha u General Secretary ka KSU u samla Donald V Thabah, la ong ba u Myntri Rangbah u kwah ïakynduh ïa ki nongïalam ka KSU ha ka 19 tarik mynta u bnai kaba dei ka Sngi Thohdieng ha ka por 12 baje mynsngi hapoh ka kamra treikam jong u ha Secretariat.
Lah ban kdew hangne ba ka KSU tang ha kine ki khyndiat taïew ka la dep ban pynlong ïa ki jingkhynra nongtrei bar jylla ha kylleng ki bynta jong ka rilum Khasi Jaiñtia. Katkum ka jingpynpaw jong u President, ka KSU tang ha kine ki 12 sngi ka la dep ban beh bad pynphai noh ïa palat 2500 ngut ki nongbylla bar jylla ki bym biang kot biang sla.
Nalor ka jingkhynra ïa ki nongbylla bar jylla ha kylleng ki jaka trei, la sakhi ruh ba ka KSU ka la pynïeng haduh 3 tylli ki khyrdop Inner Line Permit (ILP) ha Jylla, kita ha Pahammawlein, Ri-Bhoi, ha Umstain, East Jaiñtia Hills bad ruh ha Athiabari, West Khasi Hills ban talasi ïa ki kot ki sla bar jylla ba wan rung shapoh ka jylla.
Kane ka jingkhynra bad pynïeng khyrdop jong ka KSU ka long ruh ba la leh halor ka jingkynnoh ba ka sorkar jylla kam shym la shimkhia satia ban peit bad khmih ïa ka jingïoh lad jong ki bar jylla ban rung laitluid shapoh ka jylla.
Ki ar tylli ki mat dawa ba ka KSU ka la buh hakhmat ki dei ban pyntreikam noh ïa ka Inner Line Permit (ILP) bad kumjuh ruh ban pyntreikam ïa ka Meghalaya Residents Safety & Security Act.
