Shillong, Naitung 18
U Bah Nicholas Chyrmang uba dei u Secretary ka Khasi Students’ Union (KSU) Delhi Unit u don shisha ka mynsiem bad thrang ban pynpaw nam ïa ki jingbam Khasi ha nongbah Delhi.
Ha ka jingïakynduh bad U Nongsaiñ Hima ha nongbah Delhi, u Bah Nicholas u la ïathuh ba haduh mynta ym pat don ka dukan ban shet da ki jingbam Khasi. Dei na kane ka daw ba ki briew kim da tip than ïa ka jingbam Khasi bad Garo lada ïanujor bad kiwei jylla ka thaiñ Shatei Lam Mihngi.
U la ïathuh ba mynta u la sdang ban shet jingbam Khasi da kaba leh ‘online’ bad kino-kino kiba poi sha Delhi ki lah ban call ïa u.
U la ïathuh ruh ba ki jingbam Khasi kaba u la shet ha Delhi ki long jadoh, dohkhleh, pukhleiñ, putharo, rice cake bad kiwei de.
Shuh shuh u la ïathuh ba u la sah sha Delhi mynta la 10 snem hadien ba u la pyndep ïa ka jingpule na Shillong.
“Nga kwah ban leit sha Delhi ban ïoh shibun ki jingmut jingpyrkhat, haba sah ha Delhi kaba dei ka nongbah ka ri India kaba ngi la ïakynduh lut ki jaidbynriew.”
U la pyntip haba u wan sha Delhi u ïoh ban trei nyngkong ha ka ‘call centre’ hadien kata u la trei kum u medical tourist ban ïarap ïa ki briew na kiwei ki ri haba ki wan ban shim dawai na ki doktor ha Delhi bad mynta u la sdang noh da ka kam lajong ban die jingbam Khasi.
Namar kata, u Bah Nicholas u la kyntu ïa ki samla haba ki mih na jylla ki dei ban da pyntip ïa ki bahaïing, ha shnong khnang ban lait na ka jingshah thok ha ki briew haba ki wan sha Delhi.
U Bah Nicholas u la ïoh ban pyni nam ïa ki jingbam Khasi ha ka por ba u wan die ha ïew die sohtrun ha Dilli Hat, Delhi.
