Shillong, Naitung 18
Ki nongïalam ka Hyn-ñiewtrep Achik National Movement (HANM) sengkmie hapoh ka jingïalam u President ka seng u Bah Lamphrang Kharbani, ha ka 18 tarik u Naitung 2024 ki la leit ban ïakynduh ïa ka Director General of Police (DGP) ka Jylla, ka Kong Idashisha Nongrang halor ka nongrim ban dawa khot hajir ïa ki BSF kiba don ha Dangar bad Balat ka khappud bad ka ri Bangladesh bad kiwei-kiwei ki mat.
Haba kren sha ki lad pathai khubor, na ka liang u Bah Lamphrang Kharbani, u la ïathuh ba ka seng ka la ïoh jingtip ba ki don ki nongshong shnong Khasi bad Garo na kitei ki thaiñ (Balat bad Dangar) kiba la phah rung tuh ïa ki nong Bangladesh da kaba shim T.10,000 shikhlieh briew ban ailad ïa ki ba kin ïoh rung suk shapoh ka Ri India. Kumta halor kane na ka liang ka seng ka dawa ïa ka DGP ban khot hajir ïa ki BSF kiba peit ha kitei ki shnong.
“Ka jingwan rung ki bar-ri sha kane ka ri kaba ieid jong ngi, ka long kaba ma bad kaba mynsaw bha namar tang kine ki bar jylla kiba la don lypa hangne ruh ngi la i ngiah, katno tam kin dang ïai wan rung shu wan rung ki khar Bangladesh”, la ong u Bah Lamphrang.
U la ong ba ka jingwan rung jong kine ki poiwir khamtam ki nong Bangladesh, ym tang ba ki knieh ïa ka ïohkam-ïohjam jong ki samla bad jong ki trai Ri-trai muluk hynrei ki bar Ri ki ju wan hangne ha ka dur kum ki nongbylla bad ki leh pat ïa ki kam kiba laiphew jait kum ki kam tuh-kam thiem bapher-bapher.
Shuh shuh u la ong ruh ba ka seng kam kwah ba ka Jylla Meghalaya kan kylla long kum ka jylla Agartala kaba ki trai ri ki la kylla rit paid ha la ka jong ka Jylla.
“Kum ka Jaitbynriew, ngim kwah ba ka Jaitbynriew Hynñiewtrep, ngin long kum ka nongbah Agartala kaba ar namar hangthie hapoh Tripura, ngi la ïohi ba u trai ri-trai shnong u la kylla long u rit paid”, la ong u Bah Lamphrang.
U la ong ym tang ba kine ki briew nabar ka ri kin wan ban tuh ïa ka kam-ka jam jong ki trai ri-trai muluk bad ban leh ïa ki kam sniew hynrei lada kine ki briew nabar ka ri kin bun paid, kin knieh ruh sa ïa ka kam synshar-khadar da kaba kin ïohlad shisyndon ban jied ïa ki briew lajong ban synshar ïa kane ka jylla Meghalaya.
Halor kane ka bynta na ka liang ka DGP ka la ai ka jingkular ba kan sa shimkhia halor kine ki mat ba ka seng ka la pynsngew.
Kawei ka mat kaba ka seng ka la pynsngew kadei halor ka jingpynslem ban pyllait ïa ki result kam pulit bad ka jingjyllei ki kam sniew khamtam u drok ha kaba ïa kine ruh ka DGP ka la kular ban shimkhia.
