Shillong, Naitung 19
U Vice-President ka Hynñiewtrep Youths’ Council (HYC), Bah Donboklang Kharlyngdoh ha ka 19 tarik u Naitung u la shah khot hajir biang sa shisien ha ki pulit jong ka thanat Sadar ha ka por kumba 11 baje mynstep ban shim jingkylli ha kaba ïadei bad ka jingleit pynpra bad kyndang jong ka seng ïa ki ïing jong ki poiwir kiba don ha Lum Survey ha kaba na ka liang ka sorkar ka la kheiñ ba kane ka jingleh jong ka seng ka long kaba beaiñ da kaba shim ïa ka aiñ ha kti.
Ha katei ka jingwan hajir ha katei ka step, la ïohi ba na ka liang u Bah Donboklang Kharlyngdoh u la wan tang marwei shimet hapoh thanat Sadar bad ym don ki dkhot ka seng kiba wan synran lang ïa u haduh ka khyrdop jong ka thanat bad la ïohi ruh ba u la shu phong tang da ki slipar bad ka patlun lyngkot.
Haba kren sha ki lad pathai khubor, u Bah Donboklang, u la ong ba ha kane ka sngi ba u la shah khot hajir biang sa shisien u la long ba la pynkhreh ban rung shapoh patok na kata ka daw u la pynkhreh tang da ka patlun lyngkot, ka slipar bad ka baje deng kti. U la ong ruh ba u la ai jingmut jingmut sha ki pulit kiba shim jingkylli ba kin kem noh syndon ïa u mynta lada ki la isih ïa u tang na ka bynta ba u shakri ïa ka Jaitbynriew hynrei kim dei pat ban shim ïa ka jingim jong u kumba ki la dep ban leh teng ha ka por ba ki la siat ïap ïa u Bah Cherishstarfield Thangkhiew ha ka ïingsah jong u ha Mawlai.
“Ka jingwan jong nga hangne mynta ka sngi ka long ba nga la pynkhreh da kaba nga la wan da ka patlun lyngkot bad nga khlem rah mobile eiei namar ba ki la khot hajir na ka por sha ka por, nga la ong ïa ki ba kin thep syndon ïa nga hangne. Nga la long uba la khreh ban shah thep hapoh patok bad nga la pdiang sngewbha hynrei tang kawei nga la ong ïa ki ba wat nym pat pynïap ïanga kumba la jia ka jingjia hapoh Mawlai”, la ong u Bah Donboklang.
U Bah Donboklang u la ong ba ki pulit ki pynngat kyndon aiñ ïa u kumba 12-13 tylli ha kaba ki la don haduh 3 ngut ki Investigating Officer kiba la wan ban tohkit ïa u ha katei ka sngi. U Bah Donboklang u la ai jingmut ruh ïa ka sorkar ha kaba u la ong ba u la ïohi ba ka tnad pulit kaba don hapoh ka jylla ka tbit tang kumno ban khot hajir ïa ki nongïalam sengbhalang hynrei kum ka sorkar ka dei ban hikai pyntbit ruh ïa ki kumno kin ïakhun pyrshah ïa ki kam sniew kiba don hapoh ka imlang-sahlang, ban kem ïa ki nongtuh ha ki surokbah, ba kin ïada ïa ka Jaitbynriew da kaba talasi bad peit pyrman ïa ka jingwan buhai shnong jong ki nongwei-nongar kiba dang shu wan shen hynrei kiba la lah pat ban ïoh ïa ki syrnod shnong bapura bad ba kin kem ïa ki nongdih drok bad khamtam ïa ki nongdie bad ban pynim ïa ka imlang-sahlang kumba ka seng ka la lah ban pynim haduh 60 tam ngut ki samla kiba la kyrni ha u drok da kaba phah sha ki jaka ai jingsumar.
Da kaba pynpaw ba um sngewpher ïa kane ka jingïai shah khot hajir ha ki pulit na ka por sha ka por sha thanat hynrei kane ka jingkhot jong ki pulit ka long pynban kum ka jinghikai lane ka jaka pynthymmai ïa ka laisen ieid Jaitbynriew.
“Nga la ong mynha kane ba nga la wan pynthymmai ïa ka laisen ieid Ri hapoh thanat Sadar. Nga la wan ha u snem 2020, 2022 bad 2024, nga la khmih lynti ba ngan sa wan biang hadien 2026 hynrei tang hadien ar bnai, nga hap ban wan biang”, la ong u Bah Donboklang.
“Ka mynsiem jong nga kam tieng, kam khaweit hynrei nangne shakhmat, ngan dang ïai trei ban pyntikna ba ka Ri bad ka Jaitbynriew lyngba ka jingnoh synniang lang jong ngi, kan im ha kiba bun ki bynta. La kynnoh bad kynthoh ïa ngi ha kiba bun ki rukom hynrei ngim sngewpher namar ba ka mynsiem ieid Ri ka dang syaid bad rhem haduh mynta mynne. Ngin dang ïai ïakhun bad ngin ïai ïaleh khlem jingsangeh ban pyntikna ba ka Jaitbynriew jong ngi ha kiba bun ki bynta”, la bynrap u Bah Donboklang.
