Shillong, Naitung 19
Ki briew na ka Ri India bad na kiwei ki Ri kiba la rung sha India na Bangladesh lyngba ka Dawki ha West Jaiñtia Hills ki la jan kot sha ka 700 ngut ha kine ki ar sngi kynthih.
Katkum ka khubor ba la ïohlum na ka sorkar jylla, la ong ba ha ka Sngi Thohdieng, ki la don 204 ngut ki nong India ba kynthup ïa 13 ngut na Meghalaya, 158 ngut na Nepal bad uwei na Bhutan kiba la rung sha India na Bangladesh lyngba ka Dawki ICP. La ong ba kine baroh ki dei ki samla kiba pule ha Bangladesh.
Ha ka Sngi Palei pat, ki la don haduh 202 ngut ki nong India, kiba kynthup ïa 67 ngut na Meghalaya, bad 131 ngut na kiwei pat ki jylla, kiba la rung sha Meghalaya lyngba ka Dawki.
Nalor jong kine ki nong India, ki don ruh sa 101 ngut ki nong Nepal bad 7 ngut ki nong Bhutan, kiba dei ki samla pule baroh, kiba la rung sha kane ka Ri lyngba ka Dawki.
Ka sorkar jylla ka la ong ruh ba la thung ïa u Bah Hiwot Rymbai, MPS, Additional SP ka West Jaiñtia Hills kum u Nodal Officer ha ki bynta jong ka thaiñ khappud ha ryngkat u Executive Officer, Land Port Authority Dawki kum U Assistant Nodal Officer ban peit halor ki briew na Meghalaya kiba dang don ha Bangladesh bad kiba kwah ban wanphai noh sha la ka jong ka Ri.
Nalor kane na ka liang ka sorkar jylla ka la pyntip paidbah ruh ba la buh ïa u Helpline Number uba ki briew na Meghalaya kiba dang don ha Bangladesh ki lah ban phone ban ïoh jingïarap. Une u nombor u long 1800 345 3644 uba la pyntreikam mynta. Haba la kheiñ kyllum lang, kiba la rung sha India na Bangladesh lyngba ka Dawki ki long 310 ngut ha ka Sngi Palei bad 363 ngut ha ka Sngi Thohdieng. Napdeng kine, ki nong Meghalaya ki don 80 ngut.
