Shillong, Naitung 19
Ka khubor kaba la ïohlum lyngba ka ‘Website’ jong ki pulit ka jylla ha ka Sngi Thohdieng ka ïathuh ba u Elbinstone Umyiap u la ujor ba ha ka 16 tarik Naitung ha ka por 11 baje mynmiet, ar ngut ki nongtrei jong ka Seven Hill Telecom Support LLP ba la tip kyrteng kum u Daoopaia Supuh bad u Aryan Ryngkhlem ki la shah bat ha ka por ba ki dang tuh ïa u Remote Radio Unit uba shongdor T. 2,49,046 na ka jaka ba don u Mobile Tower ha Pynthorbah, Shillong.
Ha kawei pat ka jingjia, u Imran Choudhury u la ujor ba ha ka janmiet jong ka 11 tarik Naitung, ki runar ki la tuh ïa kawei ka Laptop bad kiwei pat ki tiar ki tar na ka kali jong u ha Mawlai Mawroh, Kyntonlieh, Shillong.
Shuh shuh ki pulit ki la ïathuh ba u Chairman ka Dorbar Shnong Moodymmai, West Jaiñtia Hills bad kiwei ki la ujor ba ha ka step jong ka 16 tarik Naitung ha ka por kumba 1:00 baje, ar ngut ki nongshong shnong ka Moodymmai ki la tuh dieng na Soo-Wa-Nong kaba dei ka jaka khlaw kaba don ha kane ka shnong.
Nalorkata, ka khubor na ki pulit ka ïathuh ba ka Sengmitchi T Sangma ka la ujor ba ha ka step jong ka 5 tarik Naitung, ka ar shaka jong ka (ML-08H-3956) ka la jah na ka jaka set kaba don ha Duragre, Rongkon.
Sa ha kawei pat ka jingjia, u Silang Ch Marak u la ujor ba ha ka 18 tarik Naitung, ka thuk-thuk jong u (ML-13-4569) ka la jah na kawei ka jaka kaba don ha ïew Jengjal ha West Garo Hills.
