Dhaka, Naitung 19
Ka sorkar Bangladesh ha ka Sngi Thohdieng ka la pynbna ba la pynjari da ka korphiw bad ka jingpyndonkam da ki bor shipai hadien ba ki pulit ki khlem lah ban teh lakam ïa ka jingïakynad kaba la neh la bun sngi ha kylleng ka Ri.
Katkum ki khubor na ka AFP, la ong ba haduh mynta, ki la don kumba 105 ngut ki nongïakhih kiba dei ki samla pule bad ki pulit kiba la duh noh ïa la ka jingim naduh ba sdang ka jingïakhih ha kylleng ka Bangladesh.
Ka khubor na ka AFP ka ïathuh ba ka sorkar ka la rai ban pynjari da ka korphiw bad ban pyndonkam da ki bor shipai ban ïarap ïa ka sorkar ban teh lakam ïa ka jingïakynad. Kane ka long katkum ka jingïathuh jong u Nayeemul Islam Khan, uba dei u Press Secretary ka Myntri Rangbahduh, ka Sheikh Hasina, ha ka AFP. U la ong ba ka korphiw kan treikam mardor.
Na ka liang ki pulit ha nongbah Dhaka ki la khang ïa ka jingïalum paidbah ha ka Sngi Thohdieng kum shi bynta ban teh lakam ïa ka jingïakhih. Hynrei kane ka khlem lah ban khanglad ïa ka jingïakhun hapdeng ki pulit bad ki nongïakhih ha Dhaka.
Ha kajuh ka por, ki samla pule ki la leit tur sha ka patok kaba don ha Narsingdi distrik bad ki la pyllait ïa kito kiba shah set ha shwa ba kin thang syndon ïa ka patok. Wat la ym pat lah ban ïoh jingtip kaba thikna, hynrei la antad ba da ki spah ngut ki la lait phet na kane ka patok.
Kane ka jingïakhih ka la sdang ha ka 1 tarik Naitung, bad kiba bun na ki nongïashim bynta ki dei ki samla pule kiba kwah ba ka sorkar kan pynkut noh ïa ka jingai bhah kyrpang na ka bynta ban ïoh rung kam sorkar kynthup ïa ka Civil Service.
Ha u bnai ba la lah, ka High Court ka la pynneh biang ïa ka kyndon kaba ai bhah 30 na ka 100 (30 per cent) ïa ki kam ba lait na ka bynta ki khun bad khun ksiew jong kito kiba la ïashim bynta ha ka jingïakhun ban pynïoh jinglaitluid ïa ka Bangladesh ha u snem 1971.
Ki nongïakhih ki la dawa ba dei ban pynduh noh ïa katei ka jingai bhah.
Ki nongkynthoh pyrshah ïa ka sorkar ki la ong ba katei ka jingai bhah ka ai jingmyntoi ïa ki khun jong kito kiba kyrshan ïa ka sorkar jong ka Hasina kaba la synshar ïa ka Bangladesh naduh u snem 2009.
Lah ban kdew ba ki don ki samla na India kiba pule doktor lane MBBS ha Bangladesh bad kiba bun ki dei na ka jylla Uttar Pradesh, Haryana, Meghalaya bad Jammu and Kashmir. Ki samla na India ki la pyndonkam ïa artylli ki lynti ïaid ban rung sha India naduh ba ka jingïakynad ha Bangladesh ka la sdang bad jur, bad kine ki lynti ki dei na Akhurah kaba don hajan Agartala ha Tripura bad na Dawki ha West Jaiñtia Hills ha Meghalaya.
