Shillong, Naitung:
Ki samla pule na Mawkynrew konstitwensi kiba don ha ki kyrdan pule Bachelor of Technology, Diploma of Engineering, Law, bad kiwei kiwei ki jingpule kiba ïadei bad ki kor ki bor ki la ïohpdiang da ki kompiwtor, laptop, printer bad kiwei ki tiar ba kin ïoh ban pyndonkam ha ka jingpule jong ki.
Kine ki samla pule kiba dei na ki longïing ba duna ka ïoh ka kot ki la ïohpdiang ïa kine ki tiar na u MLA ka Mawkynrew konstitwensi u Bah Banteidor Lyngdoh uba la aiti sha ki samla kiba pule BTech, electrical engineering, bad kiwei kiwei ki jingpule kiba ïadei bad ki kor ki bor, kumjuh ruh sha ki katto katne tylli ki skul kiba don hapoh ka konstitwensi.
Ha ka jingïalang kaba lyngkot kaba la long mynta ka sngi ka 18 tarik u Naitung, 2024, u Bah Banteidor u la ong ba ban trei hapoh ka konstitwensi tang na ka skhim MLA kaba T.2.5 klur, ka pisa kam pat dap satia khamtam ban bhah lang na ka bynta ban ai jingïarap sha kito kiba donkam eh, bad kum u MLA u hap ruh ban thawlad kumno ban ïoh ïarap da kaba kynshew ruh katto katne bnai ban ïoh ai na ka tulop jong u.
U la ong ba ka tulop shibnai ka long 2 lak tam bad u hap ban kynshew katto-katne bnai khnang ban ïoh thied ïa kine ki kor kompiwtor na ka tulop lajong ban aiti pat sha ki samla pule ka thaiñ kiba donkam eh ïa ka jingkyrshan jong u nongmihkhmat.
Haba pynshai ba kum u MLA u khlem pyndonkam bakla ïa ka MLA skhim, u Bah Banteidor u la ong ba ki la don ruh kiba wad jingtip lyngba ka RTI Act hynrei kita kiba wad jingtip ki kynran dien noh namar ïa ka MLA skhim ba sam haba shai ba shit.
U Bah Banteidor u la ong ba kum u MLA u dap da ka jingkmen bad jingsarong ba ki samla ka thaiñ ki la nangkiew ha ki kyrdan pule bapher bapher bad ka dei ka kamram jong u ban thawlad khamtam ïa ki samla kiba wan na ki longïing ba duna ka ïoh ka kot.
Une u MLA ka Mawkynrew u la ong ba ka ktah ïa u ban ïohi ba ki don ki khun samla kiba poi sha ki kyrdan pule bapher bapher wat hapdeng ka jingduk jingkyrduh ki kmie ki kpa kiba long ruh ki nongrep.
Kumta u la kyntu ïa ki samla pule ban pyndonkam bha ïa kine ki tiar bad u ngeit ba shisien ka sngi ka konstitwensi ka sa mih ki briew ki ban sa shakri ha ki tnat treikam ha ki kyrdan bapher bapher kiba heh.
La pynïaid ïa ka jingïalang kaba lyngkot da u Bah D Kurkalang ha ka jingdon ryngkat lang ki kmie ki kpa jong ki samla pule.
Ha kawei pat ka liang, u Bah Banteidor u la aiti lang ha kane kajuh ka sngi ïa ki kor suhjaiñ sha ki katto-katne ngut ki longkmie bad kynhun Self Help Group kiba dei napoh ka konstitwensi bad ïa kine ki kor la pynlut ban thied na ka tulop jong u MLA.
