Shillong, Naitung 19
Ka Kong Pynkmenbiang Marweiñ kaba dei shnong trai na Parïong, Eastern West Khasi Hills District ka la hap ban mih noh na la shnong ban leit bylla sha Delhi tang ban ïoh kyrshan ïa ki para kiba dang leit skul hadien ba ki la sah khunswet namar ba khlad noh ka kmie.
Ka Kong Pynkmenbiang ka don hynñiew ngut shipara bad ma ka, ka dei balai
napdeng shipara. Kine shipara ki la sah khunswet noh naduh ba khlad ka kmie ha u snem 2008 namar u kpa u khlem shong shuh bad ki khun bad u la ïoh briew noh shawei.
Ban tip kham bniah shuh shuh ïa ka jingim jong kane ka samla, u nonglum khubor jong U Nongsaiñ Hima haba u poi sha Delhi u la ïoh ban ïakren kyrpang.
Ka Kong Pynkmenbiang ka la ïathuh ba ka la wan sah sha Delhi mynta la palat shiphew snem naduh u 2014.
Ka la pyntip ba nyngkong ka la shong ïing briew ha Darjeeling bad hadien kata ka la wan sha Delhi.
“Naduh ba khlad i mei nga khlem pyndep shuh ïa ka klas-9, katba ïa ki para kynthei la shim ki sister bad ïa ki shynrang la shim ki phadar bad mynta iwei para i dang pule ha Shillong, iwei sha Ladakh, iwei sha Lucknow hynrei ngi ïakynduh shisien shisnem” ka la pynpaw.
Shuh shuh ka la ïathuh ba ka ju leit sha shnong tang ha u bnai Nohprah namar ka kwah ban rakhe Khristmas bad ki para bad bahaïing.
Kumta ka la kyntu ïa ki samla Khasi ba kim dei ban shu sahkut tang ha Meghalaya hynrei ki dei ban leit wad kam shabar ka jylla khnang ban ïar ka jingmut jingpyrkhat.
Ka la ong ruh ba lada ki samla Khasi haba ki leit bylla sha kiwei ki jylla ki dei ban long kiba don burom khnang ban lait na ka jingshah lehbeiñ ne shah ñiewbeiñ ha kiwei ki jaidbynriew.
Nalor nangta, ka la pynpaw haba ka leit bylla sha Delhi ka jingsiew ruh ka kham heh bad ka lah ruh ban kyrshan ïa ki para kiba dang leit skul.
Ka la ïathuh ruh ba ki don ki samla Khasi kiba la shah thok, hynrei da ka jingdon ki nongïalam ka KSU Delhi Unit ki la ïoh ban ïarap bad pynsah ha Meghalaya House ban phah leit phai biang sha Meghalaya.
Ka Kong Pynkmenbiang mynta ka la leit bylla ban die jingbam bad u Bah Nicholas Chyrmang uba dei nongseng ïa ka kam die jingbam Khasi ha Delhi bad uba la ïoh ruh ka lad ban wan die jingbam ha ïew die sohtrun ba la pynlong da ka sorkar Meghalaya ha Dilli Haat, Delhi.
