Shillong, Naitung 19
Ki nurse kiba trei ha ki jaka ai jingsumar bapher bapher ki la dawa ban pyndam noh ïa ka jingpynbna ka tnat ka koit ka khiah ka Jylla ban khot thungkam shipor (casual) kumba 300 tylli ki kam kiba lait na ka bynta ban trei kum ki nurse ha kane ka Jylla bad dei ban khot da kaba thungkam pura haba don ki kam kiba lait.
Kine ki nurse kiba wan lang para ma ki ban pynsngew ïa kane sha ka Sorkar, ki la ïakynduh ïa ka Myntri ka tnat ka koit ka khiah, ka Kong Ampareen Lyngdoh ha ka Sngi Thohdieng ban pynsngew shibun ki mat kiba ïadei bad ka jingthungkam pura ïa ki briew kiba dei ban ai ka jingshakri kum ki nurse.
U Bah Lurstep Nongrum uba la kren sha ki lad pathai khubor hadien ba la dep ïakynduh ïa ka Myntri, u la ong ba ka tnat ka koit ka khiah ka la pynmih ïa ka jingpynbna lait kam nurse ha ka 8 tarik Naitung, 2024 na ka bynta ban thungkam shipor ïa kumba 300 ngut ban trei kum ki nurse bad buh jingkylli, balei ym lah ban khot thungkam pura haba ki don ki kam kiba thylli khamtam namarba ha kiba bun tylli ki jaka sumar ka Sorkar la ju aidaw ba duna briew ban trei, hynrei kam treh ban thungkam pura haba don ki kam kiba thylli.
“Kumno ka Sorkar ka pynmih ban thungkam contractual ha ka jaka ba kan khot da ka jingthung kam kaba pura,” u la buh jingkylli. Hynrei u la ong ba na ka liang ka Myntri ka pynsngew ba kan don biang ka jingïakynduh bad ka Myntri ha ka 24 tarik mynta u bnai ha kaba ka lah ban don ka jingmih na ka jingïakren.
Kine ki nurse ki la ong ba ka Sorkar ka khlem pat khot shuh ban thungkam pura ïa ki nurse naduh u snem 2021.
