Shillong, Naitung 19
Ki nongtrei ki bym pat shah thungkam pura jong ka Meghalaya Energy Corporation Limited (MeECL) ki la phuhmut-phuhmat bad pynpaw ka jingkmen hadien ba ka Ïingbishar Meghalaya High Court ka la pynksan ïa ka jingdawa jong ki ban ïoh noh da ka jingsiew kaba long mar katjuh haba trei ïa kajuh ka kam (equal pay for equal work) bad ki la dawa ba ïa kane ka rai dei ban pyntreikam noh na ka bynta ka jingmyntoi jong ki nongtrei kiba khlem pat shah thung-kam pura.
Ka Ïingbishar ka la pynmih ïa ka hukum ha ka 15 tarik mynta u Naitung, 2024 hadien ba la tian bishar ïa ka mukotduma kaba la mudui da ka MePWU ha u snem 2021.
U President ka MeE CL Progressive Workers Union (MePWU) u Bah Mantiphrang Lyngdoh Kiri u la ïathuh ba na ka liang ka Union ka la dep phah ïa ka rai jong ka Ïingbishar sha u Chair-man-cum-Managing Director ka MeECL, u Sanjay Goyal ha ka Sngi Thohdieng khnang ba ki bor bahalor ka MeECL kin ïoh ban pynbeit ïa kane kumba la hukum da ka Ïingbishar namarba ka hok ban ïoh ïa ka jingsiew kaba long mar katjuh haba trei mar katjuh ka dei kaba la sahteng la slem ban ïoh ïa ka tulop kaba dei hok ha ryngkat kiwei ki jingmyntoi kumba ïoh myntoi lem ki nongtrei ka MeECL kiba la shah thungkam pura haba ïatrei kumjuh ïa ki kam.
Ka Kong Angela Rangad kaba ju synran bad ïarap ïa kine ki nongtrei ban ïakhun ban ïoh ïa ki hok jong ki nongtrei bylla, ka la ong ba ka rai jong ka Ïingbishar kaba pynksan ïa ka MePWU ka dei ka jingjop na ka bynta kine ki nongtrei kiba la ïakhun ïa ka hok jong ki ban ïoh ka jingsiew mar katjuh haba trei ïa kajuh ka kam kumba ïoh kito kiba dei ki nongtrei bapura ka MeECL.
Ka Kong Angela ka la pynkynmaw ba ki jingdawa bad jingïakren bad ki bor bahalor ka la long ruh ka jingjop ïa ki nongtrei kiba shah thungkam shipor namar ki khlem ïoh ïa ki jingmyntoi kiba ki dei ban ïoh lang kumjuh kumba ïoh ki nongtrei bapura wat haba ki la trei da ki phew snem.
Ka la ong ba ki don ruh katto-katne ki jingmyntoi kiba ki nongtrei bylla kiba la trei la bun snem ki la ïoh lyngba ki jingïakren bad jingpyni da ki kam ban ïoh ïa ka Casual Leave, Earned Leave, Arrears, EPF, bad ka jingpynkiew bainong wat lada ki dei ki nongtrei kiba shah thungkam shipor.
Kumta ka la ong ba ka hukum jong ka Ïingbishar ka dei ka jingjop namar ha ki snem kiba mynshwa ïa ka bainong jong ki nongtrei ruh ym ju pynkiew tikna bad kim ïoh ïa ki hok jong ki kum ki nongtrei bad kito kiba dang ïakhun ïa ki hok jong ki.
