New Delhi, Naitung 21
U President ka Ri America, u Joe Biden, hadien ba u la pynbna ba un ym ïakhun shuh ïa ka ilekshon President mynta u snem, u la pyntip pat ba u ai ka jingkyrshan bapura ban pynïakhun noh da ka Vice-President ba mynta ka Ri, ka Kamala Harris, kum ka kyrtong President na ka seng Democratic Party.
Haba thoh ha rynsan X, u Biden u la ong, “Ka rai banyngkong kum u kyrtong ka seng ha u snem 2020 ka long ban jied ïa ka Kamala Harris kum ka Vice-President. Bad ka la long ka rai kaba biang tam ba nga la shim. Mynta ka sngi, nga kwah ban ai ïa ka jingkyrshan bapura ïa ka Kamala ba kan long ka kyrtong jong ka seng mynta ki snem. Ko ki Democrat – ka dei ka por ban ïatylli lang ban pynliem ïa u (Donald) Trump.”
Haduh mynta, ka America kam pat ju jied ïa ka kynthei ne longkmie ban long kum ka President jong ka Ri. Ka Hillary Clinton, ha u snem 2016, ka la mih ban ïakhun pyrshah ïa u Donald J. Trump kum ka kyrtong ka seng Democratic Party. Hynrei, u Trump, na ka seng Republican Party, u la jop.
Ka Harris, 59 snem ka rta, ka dei banyngkong tam napdeng ki kynthei ban shah jied sha ka shuki Vice-President ka Ri America hadien ba u Biden u la jop pyrshah ïa u Trump ha u snem 2020.
Ka kmie jong ka Harris, ka Shyamala Gopalan, ka dei ka nongshong shnong ka Ri India kaba la kha ha Chennai (Madras), bad ka la leit sha United States ha u snem 1958 ha ka por ba ka dang dap 19 snem ban pule hadien ba ka la pyndep ïa ki jingpule jong ka na Lady Irwin College ha New Delhi. Hynrei ka kmie jong ka Kamala ka la khlad noh ha u snem 2009.
