New Delhi, Naitung 21 (UNI)
Ka Dorbar Mang Tyngka jong ka Parliament ka lah ban long kaba khluit naba ki seng ha ka liang pyrshah ki la pynsngew ïa ka mat halor ka jinglait tuh ki jingkylli jong ka National Eligibility cum Entrance Test (NEET), ka jingkynnoh pyndonkam bakla ïa ki tnad treikam Sorkar Pdeng kum ka Enforcement Directorate (ED) bad ka Central Bureau of Investigation (CBI) bad ka jingpyndap ïa ka jaka u Symbud Lamphang ha ka jingïalang jong baroh ki seng saiñ pyrthei kaba la long ha ka Sngi U Blei.
Ha ka janmiet shuwa ban long ka Dorbar, ka liang pyrshah ka la pyni ïa ki dak jingpynkhreh ban ker kdong ïa ka Sorkar National Democratic Alliance (NDA) halor ki mat bapher-bapher.
U nongïalam ka Congress, u Jairam Ramesh ha ka jingthoh ha ka rynsan lad pathai ‘X’ u la ong ba u nongïalam ka Janata Dal (United) u la dawa ïa ka thup kyrdan ba kyrpang na bynta ka Bihar.
“U nongïalam ka Yuvajana Sramika Rythu Congress Party (YSRCP) u la dawa ïa ka thup kyrdan ba kyrpang na bynta ka Andhra Pradesh. Hynrei kaba sngew lyngngoh ka long ba u nongïalam ka Telegu Desam Party (TDP) u la sngap jar halor kane ka bynta,” u la ong.
Ha kane ka jingïalang jong baroh ki seng saiñ pyrthei, u MP ka Congress, u Gaurav Gogoi, Symbud nongïalam jong ka seng ha Lok Sabha u la rah ïa ka mat halor ka NEET, ka jingkynnoh pyndonkam bakla ïa ki tnad treikam ka Sorkar Pdeng kum ka ED, CBI bad ka kam u Symbud Lamphang.
U MP ka Samajwadi Party (SP), u Ram Gopal Yadav u la pynsngew ïa ka mat halor ki jingthoh kyrteng ha ki dukan bam ha ka lynti Kanwar kaba ha Uttar Pradesh.
Haba kren sha ki lad pathai khubor hadien ka jingïalang, u nongïalam ka National Congress Party (NCP), u Praful Patel u la ong, “Baroh ki seng ki la ai ki jingai jingmut jong ki halor ka Dorbar Mang Tyngka. Kiba bun ki seng ki la rah ïa ki mat haba ïadei bad ki Jylla lajong. Kaei kaba nga la ai jingmut ka long ba ka Dorbar ka dei ban long kaba ïaid beit ïaid ryntih khlem kino-kino ki jingpynthut – kiba la long ka jingmlien mynta ban pynthut bad ban ïa hylla.”
“Na ka liang ka Biju Janata Dal (BJD), ngi la buh ïa katto-katne ki jingdawa ha ka jingïalang ki seng saiñ pyrthei…ka Odisha ka la shah pynduh ïa ka thup kyrdan kyrpang mynta la palat 20 snem,” la ong u MP ka BJD, Dr. Sasmit Patra hadien ka jingïalang.
Ïa katei ka jingïalang, la pynïaid da u Myntri ka tnad ïada ri, u Rajnath Singh. Na ka liang u Myntri ka tnad Parliamentary Affairs, u Kiren Rijiju u la pynlong ïa ka jingïalang bad ki nongïalam na ki seng bapher-bapher ban ïakren halor ki mat kiba ki thmu ban rah ha ka Dorbar.
“Ka dei ka kamram jong ka Sorkar bad ka liang pyrshah ban pynlong ïa ka Parliament kaba ïaid beit ïaid ryntih,” la ong u Rijiju.
U Myntri ka tnad ka koit ka khiah, u J.P. Nadda, Jairam Ramesh bad K. Suresh jong ka Congress, Asaduddin Owaisi jong ka All India Majlis-E-Ittehadul Muslimeen (AIMIM), u Abhay Kushwaha jong ka Rashtriya Janata Dal, Sanjay Jha jong ka Janata Dal (United) bad u Sanjay Singh jong ka Aam Aadmi Party lem bad kiwei-kiwei ki nongïalam jong ki seng ka liang pyrshah ki la ïadonlang ha ka jingïalang. Ka Myntri ka tnad pla tyngka ka Sorkar Pdeng, ka Nirmala Sitharaman kan sa wanrah ïa ka Mang Tyngka ha ka 23 tarik Naitung. Ha ka Lah Sngi U Blei, ka Sitharaman kan sa wanrah ruh ïa ka ‘Economic Survey’ ha Parliament. Ka Dorbar kan kut haduh ka 12 tarik u Nailar bad la khmih lynti ba ka Sorkar kan wanrah ïa hynriew tylli ki aiñ rew (Bill).
