New Delhi, Naitung 21
U President ba mynta ka Ri America, u Joe Biden, ha ka Sngi U Blei u la pynbna ba u la weng noh ïalade na ka jingïakhun ïa ka ilekshon President ka ban long mynta u snem.
Ka jingweng noh jong u Biden na ka jingïakhun ka long hadien kiba bun na ki nongïalam ka seng Democratic Party ki la duh jingshaniah ha u ba un lah ban pynliem ïa u kyrtong ka seng Republican Party bad u President barim, u Donald J Trump.
Mynta ka miet, u Biden, 81 snem ka rta, haba pynbna ha rynsan X, u la ong ba un bteng ha ka shuki President bad u ‘Commander-in-Chief’ ka Ri America tad haduh u Kyllalyngkot 2025. U la ong ruh ban un sa ai jingkren sha ki paidbah nongshong shnong ka Ri ha ka taïew ban wan.
“Ka dei ka burom bakhraw tam ha ka jingim jong nga ban shakri kum u President jong phi. Wat la ka la dei ka thong jong nga ban ïakhun biang ha kane ka ilekshon, hynrei nga ngeit ba kan bha ba ngan shong noh da kaba buh ïa ka jingbha na ka bynta ka seng bad ka Ri hakhmat. Mynta, ngan bteng ban pyndep ïa ki kamram jong u President haduh ban da ka kut ka samoi treikam,” la thoh u Biden.
U Biden, shwa ba un shah jied kum u President ha u snem 2020 da kaba pynliem ïa u Trump, u la long ruh u Vice-President ka America haduh phra snem kynthih ha ka por ba u Barak Obama u la long kum u President.
Lah ban kdew ba ka jingpynbna jong u Biden ban weng noh na ka jingïakhun ïa ka ilekshon President ka la long hadien kiba bun na ki nongthawaiñ ka seng Democratic Party bad ki nongkitkam ka seng ki la pynbor ïa u ba u dei ban ym ïakhun shuh ïa ka ilekshon President hadien ba u khlem lah ban leh bha ha ka jingïatai nia kaba para marwei bad u Trump. Ïa kane ka jingïatai nia la pyni paidbah ha ka 27 tarik Jylliew.
Ïa mynta, u Biden u dang hap ban don hapdeng ka jingpeit bniah hadien ba u la ïoh biang ïa ka jingpang COVID-19 ha ka 18 tarik Naitung.
Ha kine ki khyndiat sngi, u Biden u la pynpaw ba um kwah satia ban weng noh ïalade na ka jingïakhun, bad un ïa aireng beit pyrshah ïa u Trump ha ka ilekshon ka ban long ha u Naiwieng.
Ha u snem 2020, u Biden u la pynliem ïa u Trump da kaba tam palat 7 million ‘vote’, bad u Biden u la ïoh 51.3% na ka ‘vote’ katba u Trump u la ïoh 46.8%.
