Shillong, Naitung 21
Ka Sorkar Jylla ka la dep siew kumba T.4 klur sha ka Airport Authority of India (AAI) na ka bynta ban pule bniah nadong-shadong ïa ki jingdonkam bad pynkhreh ïa ki jingdonkam kiba donkam ban pynbit-pynbiang ha kad liengsuiñ Umroi, Ri Bhoi district namar kam long shuh kaba suk ban tei da kawei pat ka lad liengsuiñ.
Ka AAI ka la bynshet ha ka kynhun pule bniah bad ka kam ka la nang ïaid shaid-shaid ha kaba yn sa phah ïa ka kaiphod sha ka Sorkar Jylla bad ka Sorkar Jylla kan sa shim ïa ki sienjam ha ryngkat ka jingpan jingkyrshan na ka Sorkar Pdeng lyngba ka tnat Civil Aviation.
Ka kad liengsuiñ ha Umroi kam pat long satia kaba bit kaba biang ban ai jingshakri pura ïa ki kompani pynïaid liengsuiñ namar ki dang don shibun ki jingdonkam naduh ki jingtei jingshna kynthup ka jingpynjrong shuh shuh ïa ka bynta hiar bad her ki liengsuiñ (run way) khnang ban lah pyndonkam da ki liengsuiñ kiba heh kumba long ha kiwei pat ki lad liengsuiñ.
Ka kad liengsuiñ ha Umroi ka dei kaba don shibun ki jingbymbiang naduh ka jingker tawiar da ki lum rit kaba buh jingeh ïa ki liengsuiñ ha ka por ba sdang ban her namar ka kad liengsuiñ ka don ha ka jaka ba long them bad kam da dei kaba heh kumba long kiwei pat ki kad liengsuiñ.
Ha kine ki khyndiat snem, ka Sorkar Jylla ka la hap ban shim katto katne ki sienjam ban pom ïa ki lum rit kiba don hajan jong ka kad liengsuiñ bad katkum ka jingai jingkheiñ ka Technical Committee ha kine ki khyndiat snem, ka lad liengsuiñ ha Umroi ka donkam ïa ka jinglut kaba kot sha ka T.7000 klur na ka bynta ban shna pynbha bad pynheh ïa kankad liengsuiñ bad ban weng lut ïa baroh ki jingeh (hurdles) kiba ïadei bad ka jingpyntreikam pura ïa ka kad liengsuiñ.
Hynrei ka Sorkar Jylla ka la ong ïa ka AAI ban khmih bniah biang ïa kane khamtam eh ban ïoh ka jingkheiñ kaba shai haduh katno yn dang donkam ban pynlut tang na ka bynta ki katto katne ki jingdonkam kiba kongsan khnang ban pyntreikam pura khamtam eh ban ïoh pyntreikam da ki liengsuiñ kiba kham heh.
Kumba ka long mynta, ki dang don tang ki liengsuiñ kiba kham rit kiba ju ai ka jingshakri na Umroi ban kit ïa ki nongleit nongwan sha kiwei pat ki nongbah kum ka Kolkata, Delhi, bad ki nongbah ha ki Jylla ka Thaiñ Shatei Lam Mihngi.
