Dhaka, Naitung 21 (UNI)
Ka Supreme Court ha Bangladesh ha ka Sngi U Blei ka la pyndam ïa kiba bun ki jingai bhah ha ki kam sorkar hadien ba la mih ka jingïakynad ba shyrkhei ha kylleng ha Ri ha kaba palat 100 ngut ki briew ki la duh noh ïa la ka jingim, la ong ki lad pathai khubor.
Ha ka jingshisha, 30 na ka 100 lane 30% jong ki kam sorkar la bhah kyrpang na ka bynta ki bahaïing hasem jong kito kiba la ïashim bynta ha ka thma ban pynïoh jinglait-luid ïa ka Bangladesh ha u snem 1971. Hynrei ka Supreme Court mynta ka sngi ka la rai ba ïa kane ka jingai bhah dei ban pynhiar sha ka 5 na ka 100 lane 5%.
Na ka liang jong ka sorkar kam pat kynthoh eiei halor katei ka rai jong ka Supreme Court. Na ka liang jong kawei ka lad pathai khubor ka la pyntip ba u nongaiktien jong kawei na ki seng ki samla pule u la ong ba ka jingïakhih kan bteng.
Ki lad pathai khubor na Bangladesh ki ïathuh ba ka Supreme Court ka la rai ba 93 na ka 100 (93%) jong ki kam ki jam ha ka sorkar dei ban jied katkum ka jingtbit jong ki nongthep kam bad 5% dei ban ai bhah ïa ki bahaïing hasem jong kito ki briew kiba la ïashim bynta ha ka thma ban pynïoh jinglaitluid. Ka 2 na ka 100 (2%) kaba sah ka dei ban long ka bhah na ka bynta ki kynhun rit paid lane na ka bynta ki briew kiba don jingduna ha ki dkhot met.
Ka khubor na ka BBC ka ïathuh ba ki surok bad ki lynti syngkien ha ka nongbah Dhaka ki thylli ha ka sngi ba ar jong ka korphiw, hynrei la don ruh ki jingïakynad ha ki katto katne ki jaka. Ka khubor na ka Reuters pat ka la pyntip ba ki shipai jong ka Bangladesh ki dang ïai bteng ban pahara ïa ka nongbah.
Haduh mynta, kumba 115 ngut ki briew ki la ïap naduh ba sdang ka jingïakynad ha kylleng ka Bangladesh naduh ka 1 tarik Naitung. Hynrei na ka liang ki lad pathai khubor na Bangladesh ki la ong ba ka jingïap jong ki briew ka la kham bun ban ïa kane ka 115 ngut. La ong ruh ba tang ha ka Sngi Thohdieng, ki la don kumba 50 ngut ki briew kiba la ïap.
Ha u snem 2018, ka sorkar jong ka Myntri Rangbahduh Sheikh Hasina ka la pyndam ïa ka jingai bhah, hynrei kawei ka ïingbishar ba kham rit ka la pynneh biang ïa ka jingai bhah ha ki kam sorkar lyngba ka rai jong ka.
Kane ka rai jong ka ïingbishar ka la wanrah ïa ka jingïakynad bad jingïakhih bashyrkhei ha kylleng ka Ri bad ki samla pule ki la ong ba kane ka jingai bhah ka long kaba noh shiliang.
Na ka liang ka sorkar ka la khyrwit ïa ki nongïakhih bad ka la pynjari da ka korphiw ban tem ïa ka jingïakynad.
