Shillong, Naitung 21
Ka Sorkar Jylla ka la pynkhreh ban buh la kumno-kumno ar tylli ki skulbah kiba pynïaid hi da ka Sorkar Jylla namarba la jyllei ki skulbah shimet katba ka jingshakri jong ki kam shym la long kumba khmih lynti.
Kumba ka long mynta, kawei ka skulbah kaba pynïaid da ka Sorkar Jylla ka la dep don kaba kyrteng ka Williamson Sangma University kaba la ainam ha ka kyrteng u Myntri Rangbah banyngkong eh ka Meghalaya, u Captain Williamson A Sangma.
Ban buh ïa ki skulbah donkam ban wanrah ïa ka aiñ ha Ïingdorbar Thaw-aiñ ka Jylla na ka bynta ban mynjur hapoh ka dorbar bad ki la don bun tylli ki aiñ kiba la mynjur da ka Ïingdorbar Thaw-aiñ ka Jylla ha ki phew snem ba la dep na ka bynta ban buh ïa ki skulbah shimet.
Ka tyllong khubor ka ïathuh ba ka Sorkar Jylla hapoh ka jingïalam u Myntri Rangbah Conrad K Sangma ka la pyrkhat jngai halor ka jingdonkam ban don ki skulbah kiba pynïaid hi da ka Sorkar Jylla na ka bynta ban pynsuk ïa ki samla pule ka Jylla khamtam eh haba mih ki jingeh ba ki kolej ha Jylla ki hap ban bud beit katkum ki jingbthah ka Sorkar Pdeng ïa ki skulbah jong ka Sorkar Pdeng kiba don ha kylleng ka ri.
La ong ba haba don ki skulbah kiba pynïaid hi da ka Sorkar Jylla, kan pynsuk ruh ïa ki kolej ha Jylla ban ïasoh bad kine ki skulbah ha ka jaka ba kin leit pynïasoh (affiliate) bad ki skulbah jong ka Sorkar Pdeng lane bad ki skulbah shimet.
Ha Meghalaya, ka Sorkar Pdeng ka la buh kawei ka skulbah ka North Eastern Hill University (NEHU) kaba la don mynta la jan kot 50 snem.
La ïathuh ba ka Sorkar MDA mynta ka dang khmih bniah kumno ban pynïaid shakhmat ïa ka jingthmu ban buh sa kawei ka skulbah jong ka Jylla. Na liang ka tnat pule puthi ka dang khmih bniah ruh ïa ki kolej kiba la don lypa kiba dei peit dei khmih da ka Sorkar na ka bynta ban pynkylla sha ka skulbah da kaba wanrah ïa ka aiñ hapoh ka Ïingdorbar Thawaiñ ka Jylla.
Kiba bun ki kolej ha Meghalaya ki dang pynïasoh bad ka skulbah NEHU bad ki dang hap ban bud ryntih lang ïa ki kyndon kiba wan na ka Sorkar Pdeng lyngba jong ka NEHU.
