Shillong, Naitung 21
Ka Seng Samla Shnong Umpling ha ryngkat ka Dorbar Shnong Umpling da ka jingïatreilang bad ka Rynjah State Dispensary bad kiwei-kiwei ki tnat treikam jong ka tnad ka koit ka khiah ka sorkar jylla ha ka Sngi Saitjaiñ ka 20 tarik u Naitung ki la pynlong ïa ka jingai jingsumar ei bad ka jingai snam ei sha kito kiba donkam ïa ka jingïarap.
Haba ai jingkren ha katei ka sngi kum u kongsan, na ka liang u Bah Heavingstone Kharpran uba dei u MLA ka Mawryngkneng Constituency, u la ong ba kum ki briew ki donkam bha ïa ka jingkoit jingkhiah bad kumta ban ïoh ïa ka met kaba koit ba khiah ki donkam ban sumar bha ïalade da kaba bam ruh ïa ki jingbam kiba tei ïa ka met bad ym dei ban bam ïa ki jingbam kiba pynsniew kylla ïa ka met jong ki khnang ba kum ki briew kin lah ban im kham slem ha ka rta.
“Kawei ruh ban long ki briew kiba koit ba khiah, ngi dei ban long ki briew kiba don ïa ka jingmut jingpyrkhat kaba bha bad ban ïaleh ban lait na ka jingdon ïa shibun ki jingmut-jingpyrkhat namar lada bun ki jingmut-jingpyrkhat ruh, ki jingpang ha u briew ki jur”, la ong u Bah Heavingstone.
Na ka liang u Rangbah Shnong jong ka Umpling, Bah S F. Pyngrope, u la ong ba ka jingpynlong jong ka shnong ïa kane ka jingai sumar ei ka dei hadien ba ka la ïohi ba kiba bun ki nongpang kim treh ban leit phah sumar ha ki jaka ai jingsumar namar ba ki shem jingeh ban siew ïa ka bai sumar namar ba ki dei kiba wan na ki longïing-longsem kiba duna ha ka ïoh ka kot. U la ong ba ka long kaba pyndonkam ban pynlong ïa kum kine ki jingai sumar ei hapoh ki shnong ki thaw bad ym tang katta ka shnong kan sa ïaleh ruh ban pynlong da ki prokram pynsngewthuh paidbah ha kaba ïadei bad ka koit ka khiah. Nalor u MLA bad u Rangbah Shnong ka Umpling, ha katei ka sngi la don lang ruh da ka Editor jong ka kotkhubor ‘The Shillong Times’ ka Kong Patricia Mukhim, bad kiwei.
