Shillong, Naitung 21
Ka Kong Lumbha Lawai kaba dei shnong na Mawryngkneng, East Khasi Hills District ka la ïathuh ba ki briew na Delhi ki wad bha ïa ki jingbam ba wanrah na Meghalaya namar ki dei ki jingthung bym pyndonkam dawai kata kum u shynrai Lakadong, u khaw jashulia, u sohmrit, nei-ïong, nei-lieh, slatyrpad bad ki masala.
Haba ïoh ban ïakren bad ka Kong Lawai haba ïakynduh ha ïew die sohtrun ha Delhi, ka la ïathuh ba ka kompani jong ka, ka mihkhmat tang marwei kaba buh ïa ka jaka saiñ ïa kine ki jingtah-jingber ha Lummawrie Laitumkhrah Shillong.
Ka la ïathuh ba ïa kane ka karkhana la sdang ha u snem 2016 bad mynta ki don haduh 10 ngut kiba trei katba ma ka pat ka dei kaba pynsong ïa ki jait jingthung hadien ba la dei saiñ.
“Haba nga wan ban die ïa kine ki masala ban shet jyntah ki briew ha Delhi ki ïaknieh bha namar ki tip ba ngim ju pyndonkam dawai” ka la ong.
Ka la ïathuh ba ha Shillong ki ju leit buh ha ki dukan kum ha Khyndailad, Laitumkhrah bad ha Upper Shillong ruh.
Ka la pyntip ba lada ki briew na jylla ki kwah ban thied ïa kine ki mar ba la dep shna ki lah ban ‘online’ ruh.
Shuh shuh ka la pyntip ba ka kompani ka ju shim na ki nongrep napoh ka jylla ban shna pat ha Laitumkhrah.
Ka la pynpaw ka jingsngewkmen haba ka la ïoh lad ban pyninam ïa ka kompani na Laitumkhrah sha Delhi khnang lyngba ka jingïarap jong ka sorkar jylla.
Kane ka iew die sohtrun ha Delhi kam shym la khring ïa ki nongrep sohtrun hynrei ka sorkar ka la ïalam lang ïa ki nongrep na kiwei pat ki jait soh khnang ba kin wan twad jingmut ban pynïaid lang bad kumjuh ruh ka sorkar ka la ïalam ïa ki briew kiba la sdang ban seng kam lajong ban shim ïa ki mar rep na ki jingthung ba wan die ki nongrep.
