Jowai, Naitung:
Ka seng ki kontraktor bad Supplier kaba tip kum ka All Jaiñtia Contractor & Supplier Association (AJCSA) ka la khot bad wer ïa baroh ki kontraktor bad Supplier jong ka Ri-lum Jaiñtia na East bad West Jaiñtia sha ka ‘General Meeting’ ka ban long ha ka 26 tarik Naitung ha ka por 11.00 baje mynstep ha District Library Mynthong Jowai.
Ha u kyrwoh ba la phah da u Publicity Secretary, Bah Shanbor Lamare, la ong ba ha kane ka jingïalang yn pynshai paidbah shaphang ka GST, shaphang ki nongtrei (Labour) bad kiwei-kiwei ki jingeh ba ïakynduh ki kontraktor bad ki Supplier ka ban batai da ki ‘riew shemphang.
Nalorkata yn don ruh ka jingïakren sani halor ki jingeh jong ki kontraktor bad ki Supplier.
Ha kane ka sngi yn donlang ruh da ki nongïalam ba hakhmat jong ka All Meghalya Contractor and Supplier Association (AMC&SA) Shillong, ban ïasyllok bad ki kontraktor bad Supplier.
Kumta da ka mynsiem ba ïatylli bad khlem kheiñ ïa ka jingïapher ha ka kam politik ne ha kano-kano ka bynta, la kyrpad ïa baroh ban wan sha kane ka jingïalang na ka bynta ka bha ka miat bad ka jingmyntoi jong baroh.
