Nongpoh, Naitung:
U MLA ka Nongpoh u Bah Mayralborn Syiem ha ka Sngi Saitjaiñ u la plie paidbah ïa ar tylli ki dukan harud jong ka surok bah National Highway 6 ba kynthup ïa kawei ka dukan bam kaba la ai kyrteng Eastern Aroma ha Downgate, Nongpoh bad kawei pat ka dukan ban sumar bad die ïa ki dawai mrad lane ka Veterinary Clinic kaba la ai kyrteng Bhoi Veterinary Clinic ha Pahamlapong.
Ha ka jingplie ïa ka dukan bam Eastern Aroma ha Downgate Nongpoh, nalor u Bah Mayralborn Syiem la wan ban ïadon ryngkat ruh da u Pastor Robert Terang, u Pastor K Rapsang, Pastor Garfield Sangma, ki ar ngut ki trai jong ka dukan, u samla Peter Syiem bad u samla Aaron Reginald Ingty nalor ki bahaïing hasem bad ki paralok kiba ïajan.
Ha ka jingplie pat ïa ka dukan sumar bad ai dawai mrad ha Pahamlapong kaba la dei trai da u Dr. Esra Syiem, nalor u Bah Mayralborn Syiem, la wan ban ïadon ryngkat ruh da u Pastor Jerermy O Khanglam bad kiwei kiwe ki nongïalam balang nalor ki bahaïing hasem.
Haba kren ha kine ki ar tylli ki jingplie dukan, u Bah Mayralborn u la pynpaw ïa ka jingsngewkmen ban ïohi ba ki khun samla ka thaiñ ki la mih shakhmat ym tang ban seng kam na ka bynta ïalade shimet lane ban ïeng ha la ki jong ki kjat, hynrei ban ai kam ruh sha kiwei pat ki samla, khamtam ha kane ka juk kyrduh kam.
U la ong ruh ba ka long da shisha kaba eh ba ka sorkar ban aikam lut ïa baroh ki samla, hynrei wat hapdeng kita ka jingeh bad ki jingkyrduh kam, u la ai pat ka jingïaroh sha kine ki samla kiba la mih shakhmat ban ïakhun ïa kita ki jingeh ban thawlad pat na ka bynta ban sengkam sengjam ban pynbit pynbiang ïa ka ïng ka sem lyngba ki sap bapher bapher kaba ki don.
