Shillong, Naitung 22
U Superintendent of Police (SP) jong ka East Khasi Hills u Bah Sylvester Nongtnger u la pynmih da ka jingmaham sha ki nongñiah ar shaka (two-wheeler) ba kim dei ban ñiah shongshit ne thurmur bad buh jingma ïa ka leit ka wan jong ki paidbah.
Haba pynmih ïa ka jingmaham, la khang pyrshah ïa ki ar shaka ba kin rung na ki surok ba la khang ne shah rung tang shiliang (One-Way) lane ban jam shakhmat na ka bynta ka bym dei (wrong side) naba kane ka buh pat ha ka jingma ïa ki nongïaid lynti.
Ha ka kyrwoh khubor ba la pyllait, u SP ka East Khasi Hills u la kdew ba ki la don bun tylli ki jingujor na ki ‘riew paidbah ha kaba ïadei bad ka jingñiah khlem akor jong ki nongñiah ar shaka, da kaba rung beit na ki surok ne lynti ba la buh One-Way bad ruh kiba ju jam shakhmat beit wat na ka liang bym dei, kaba buh jingma pat ïa ki paidbah kiba ïaid ba ïeng kumjuh ruh ïa kito ki hiar na ki kali.
U SP u la maham ba ki nongñiah ar shaka bad kumjuh ruh ki nongñiah kali ki dei ban bud ryntih ïa ki kyndon aiñ pynïaid kali bad yn pynshitom beit ïa kito kiba ïaleh ne pynkheiñ ïa ki kyndon aiñ.
