Nongstoiñ, Naitung 22
Ki nongïalam ka Khasi Students Union (KSU) Nongstoiñ Circle ba kynthup ïa u President samla Willbest Wanniang bad u General Secretary samla Comingstar Kharsyntiew ki la shah khot hajir ha ki pulit ka thanat Nongstoiñ Sadar ha ka Lah Sngi U Blei ka taïew.
Katei ka jingshah khot hajir jong ki nongïalam ka KSU Nongstoiñ Circle ka dei halor ka jingleit khynra jong ka seng ïa ki kot ki sla jong ki nongtrei bar jylla ha kine ki sngi ba la dep.
Ha kane ka sngi khot hajir ïa kine ar ngut ki nongïalam la synran lang da ki nongkitkam ka KSU Nongstoiñ Circle kumjuh ruh ki nongkitkam na ka KSU West Khasi Hills District Unit ba kynthup ïa u samla Franklin Syiemïong, General Secretary, samla Wanbhakupar Lyngdoh Nonglait Organising Secretary bad kiwei kiwei.
U President ka KSU Nongstoiñ Circle u samla Willbest Wanniang, ha ka jingdonlang u samla Comingstar Kharsyntiew General Secretary, u la ong ba ka jingleit ka jong ki sha thanat Nongstoiñ Sadar ka long halor ka jingshah khot hajir halor ki kam khynra bar jylla.
U samla Willbest u la ong ruh ba kane ka jingleh ka dei tang ka jingpyntieng kohtympan jong ka sorkar, bad u la ïathuh ruh ba ka jingshah khot hajir jong ki, ka long ba ki pulit ki la pynshong nongrim tang na ki video ha ki social media.
“Nangne shakhmat ngin nym ailad bad ngin ïai bteng ïa ka ban khynra ïa ki bar jylla kiba wan trei la ki lah ban pynbiang ïa ki kot ki sla, na ka liang ka seng ïa kata kan sa peit hynrei ïa ki bym biang ïa ki kot ki sla, ngin kynther beit bad ngin phah leit sha ka jaka na kaba ki wan,” la ong u samla Willbest.
U samla Comingstar Kharsyntiew u la ong, “Na ka liang ka seng, ngi ngim tieng ïa ka thanat, ngi ïeng na ka bynta ka lawei ka jaidbynriew ka jong ngi.”
U samla Franklin Syiemïong, General Secretary ka KSU West Khasi Hills District Unit u la ong ba ki jingpyntieng, ki jingpynsmiej lyngba kita ki aiñ lyngba ki lad ki lynti ki bapher bapher na kino-kino ki bor kin ym lah satia ban khang ïa ka mynsiem ïaleh ban khang ïa ka mynsiem shakri jong ki dkhot ka KSU.
“Kam pher lada phi pyntap da ki phew tylli ki mukotduma hynrei ka jingïaleh ka jong ngi kan dang ïai bteng bad kan nym sangeh namar ngi tip ba ngi leh ïa kine kiei-kiei baroh na ka bynta ban ïada bad pynneh-pynsah bad khamtam eh ba ka jaidbynriew kan lait na ki tyrsim jong ka jinglong mraw,” la ong u samla Franklin.
U samla Franklin u la kyntu ruh ïa ki dkhot ka KSU ha ki shnat bad jylli bapher bapher ba nangne shakhmat kin nang pynkhlaiñ bad nang pynrhem shuh shuh ïa ka mynsiem ha kaba khynra katba ka sorkar lyngba ki aiñ ki jong ka kan nang pyntyrha.
