Shillong, Naitung 22
Ka Meghalaya Traders Fresh Vegetables & Ginger Association (MTFVGA) ha ka Lah Sngi U Blei ka la pynpaw ka jingsngewkhia halor ka jingkynnoh lum khajna be-aiñ kaba na ka por sha ka por jong ki ‘Weigh Bridge’ kiba don ha kylleng ka Jylla na ki kali kit mar-rep.
“Kane ka jinglum khajna be-aiñ na ki kali kit jhur, na ka por sha ka por, ym dei shuh tang mynta namar teng-teng ïa u nongñiah ruh haduh ba kin da shoh. Teng-teng lada tam tang 100 kilo u jhur, ki shim T.1000-2000 bad ka long kumba ki shu tuh im-im peit-peit – bad miet bad step ki shu tuh beit na ki kali kit jhur,” la ong u Working President ka seng, Bah Henry Dkhar haba kren sha ki nongthoh khubor hadien ka jingïakynduh bad ka Myntri ka tnad ka rep ka riang, Dr. M. Ampareen Lyngdoh.
U la ong ruh ba wat la ka seng na ka por sha ka por ka la ujor haba ïadei bad kane sha ki pulit kumjuh ki heh Sorkar hynrei kam shym long kaba seisoh.
“Nga kyrpad ïa ka Sorkar ban shimkhia ïa kane ka kam khamtam ba ka surok Sonapur phi la ïohi ka long kumto, ngim ju lap ïew. Tang ha ka dheng kali ruh 2-3 kynta, hynrei ynda la poi ha ki khyrdop, ki peit ïa ka ‘Challan’, ki ong ba kit palat pud, ki pynïeng kai ïa ki kali da ki kynta bad kumta ter-ter,” la ong u Bah Dkhar.
Kaba kham buh jingeh shuh-shuh ka long ba ki briew kiba don ha kitei ki ‘Weigh Bridge’ kim ju treh kren ïa ki nongïalam ka seng hynrei ki byrngem bad shoh pynban ïa ki nongñiah, la kynnoh u Bah Dkhar.
“Na ka liang ka seng, ngi la shong jingïalang bad ngi la rai bad lada ki ïai leh donbor sah kumne, ngim banse ban pan jingkyrshan na ka liang ki kynhun seng ban khmih lem ïa kane ka kam. Lada ktah ïa u nongkhaïi, kan ktah ïa u nongrep,” u la ong.
Ha kawei ka liang, u President ka MTFVGA, Bah B. Mawthoh u la pynkynmaw ba ka seng ha ka jingïakynduh ïa ki Symbud Myntri Rangbah ka Jylla – Bah Sniawbhalang Dhar bad Bah Prestone Tynsong, la lah ban pynbeit haba ïadei bad ka mat halor ka ‘No Entry’ na bynta ki kali kit jhur, kiba mih na Ïewduh bad kiba wan nabar kumjuh.
Halor ka mat jong ka jinglum khajna ha ki ‘Weigh Bridge’, u Bah Mawthoh u la ïathuh ba wat la u Symbud Myntri Rangbah ba peit ïa ka tnad Transport u la ong ba ym dei shuh ban ai ïa ka khajna, hynrei kumba ka long, ka jinglum khajna na ki kali kit mar-rep ka dang bteng ha ki ‘Weigh Bridge’.
Haba phai sha ka jingïakynduh jong ka seng bad ka Myntri ka tnad ka rep ka riang mynta ka sngi, u President u la ong ba ka Myntri ka la kular ban lum jingïalang bad ka tnad Transport, ka rep ka riang, tnad ïew, DIG ha kine ki khyndiat sngi ban wan halor kane ka bynta.
Haba jubab, u la ong, “Kumba ka long mynta, ki mar-rep ki dei ban ïaid wut-wut hynrei kiba bun bah ki shah pyndik. Ngi ju kren na ka por sha ka por ïa kane ka bynta, hynrei haduh mynta ka jingïakren ka sah tang ka jingkren hynrei ka jingshah pyndik ka dang ïaid beit.”
Shuh shuh haba kylli katno ki ju khrong na kawei ka trok, u la bynrap, “Teng-teng don kiba lum T.1000 bad don kiba palat ïa kata bad kumta ki nongñiah kim banse ban ai la ka ai. Kim ju ai ‘receipt’…ki lum kiba shong ha Umling, Khliehtyrshi, bad Ratacherra.”
