New Delhi, Naitung 22
Ka Sorkar India ka la weng noh ïa kawei ka hukum ba la pynmih ha u snem 1966 kaba la mana ïa ki nongtrei sorkar ban ïashim bynta ha ki kam jong ka Rashtriya Swayamsevak Sangh (RSS), bad kane ka rai ka la ïoh ïa ka jingïaroh na ka RSS.
Haba ai jingthoh ha rynsan X, u nongïalam ka BJP, u Amit Malviya, u la ong, “Ïa ka hukum kaba long pyrshah ïa ka Riti Synshar ba la pynmih 58 snem mynshwa, kata, ha u snem 1966, kaba khang lane mana ïa ki nongtrei sorkar ban ïashim bynta ha ki kam jong ka RSS, la weng noh da ka sorkar jong u Modi. Ha ka jingshisha, katei ka hukum ba la pynmih ha u snem 1966 kam shym dei ban don.”
“Ïa katei ka jingmana la wanrah namar ha ka 7 tarik Naiwieng, 1966, ka la don ka jingïakhih kaba jur ha Parliament ban pyrshah ïa ka jingshoh doh ïa ki masi. Na ka liang ka RSS-Jan Sangh ka la ïoh ïa ka jingkyrshan na ki lak ngut. Kiba bun ki briew ki la khlad na ka jingshah siat ha ki pulit. Ha ka 30 tarik Naiwieng, 1966, na ka liang ka sorkar jong ka Indira Gandhi ka la mana bad khang ïa ki nongtrei sorkar ban ïasnoh bad ka RSS,” la ong u Malviya.
Na ka liang ka RSS ha ka Lah Sngi U Blei ka la pdiang sngewbha bad ïaroh ïa ka sorkar jong u Narendra Modi kaba la weng noh ïa katei ka hukum jong u snem 1966.
U nongïalam ka RSS, u Sunil Ambedkar, u la ong ba ka RSS ka la don bynta ha ka jingtei ïa ka Ri bad ban shakri ïa ka imlang sahlang mynta la 99 snem. Naduh ka jinglong shngaiñ jong ka Ri haduh ka jingwanrah ïa ka jingïatylli ha ka Ri bad ka jingai jingïarap ha ki por ba wan lynshop ki jingjia, ka RSS ka la trei khlem shongthait ban ïarap ïa ki nongshong shnong jong ka Ri, la ong u Ambedkar.
U la ong ruh ba ki sorkar ba mynshwa ki la buh da ka jingmana ïa ki nongtrei sorkar ban ïashim bynta ha ki kam jong ka RSS na ka daw saiñpyrthei.
