Jowai, Naitung:
U Symbud Myntri Rangbah ka Jylla, Bah Sniawbhalang Dhar ha ka 19 tarik Naitung u la hiar jurip ïa ka jingpyntrei surok na Ummulong-Tyrshang- Bamkamar kaba jngai 22 kilo mitar.
Ïa u Symbud Myntri la synrang lang da u SDO ka tnad PWD Jowai-Central Division, Bah O. Thubru bad u Engineer, Bah Y. Shangpliang kumjuh ki Waheh Shnong bad ki ‘riew rangbah jong ki shnong kiba ïaid lyngba ïa kane ka surok.
Ka jingpyntrei ïa ka surok ka la sdang naduh u snem 2022 bad la buh thong ban pyndep haduh u snem 2025. Ka jinglut ban shna ïa kane ka surok ka la kot sha ka T.42 klur tam. U Bah Sniawbhalang Dhar u la ong ka jingpyntrei ïa kane ka surok la dep kumba 90% bad ha kajuh ka por, u la kyntu ïa ki karikor ka tnad PWD ban shimkhia ban buddien bad ban peit bniah bha khnang ba ka jingpyntrei ïa kane ka surok kan long kaba ïaid beit katkum ka jingthmu.
