Shillong, Naitung 22
Ki Chief Executive Member (CEM) bad nongmihkhmat na ki 10 tylli ki Autonomous District Council (ADC) kiba dei na ki Jylla ka Thaiñ Shatei Lam Mihngi kin ïakynduh ïa u Myntri Korbar Ri ka Sorkar Pdeng, u Amit Shah ha New Delhi ha ka Sngi Ba-ar ban pynsngew biang ïa ka jingdawa ban wanrah noh ïa ka aiñ ban pynkylla ïa ka Khyrnit Bahynriew (6th Schedule) jong ka Riti Synshar nalor kiwei pat ki mat kiba donkam ban pynkhlaiñ ïa ki ADC.
Ki ADC na ka Thaiñ Shatei Lam Mihngi ki la pynpaw kawei ka sur lyngba ka jingïakynduhlang jong ki ha New Delhi naduh ka Sngi Saitjaiñ (20 tarik Naitung) kaba la bteng haduh ka Lah Sngi U Blei.
Ïa kane ka jingïalang jong ki ADC la pynïaid da u Promod Boro uba dei u CEM ka Bodoland Territorial Council (BTC) ha ryngkat u nongïalam ka The Indigenous Progressive Regional Alliance (TIPRA) u Pradyot Debbarman lem bad kiwei kiwei ki MDC kiba mihkhmat ïa la ki jong ki ADC.
U CEM ka KHADC u Bah Pynïaid Sing Syiem u la ïathuh ba ha kane ka jingïakynduh lang jong baroh ki CEM la rai ban ïakynduh ïa u Amit Shah bad aiti ruh ïa ka dorkhas ha u ban kynthup lang ïa ki jingeh ha la ki jong ki jong ki ADC khamtam ha ka liang ka pisa tyngka bad kiwei ki aiñ kiba donkam ban ïada ïa ki paid riewlum ha thaiñ Shatei Lam Mihngi.
U Bah Pynïaid u la ong na ka liang ka KHADC ka ïeng ha kajuh ka nongrim ha kaba ïadei bad ka jingpynkylla ïa ka Sixth Schedule kata ban nym don ka kyntien Village Council namar ki don ki Dorbar Shnong katkum ka riti ka dustur jong ka jingsynshar shnong nalor ki Raid ki Hima.
U la ong ruh ba ka KHADC kam kwah ban mih ka kyntien Unrepresented Tribe hapoh ka Sixth Schedule bad ha ka jingbun shuh shuh ïa ki dkhot, ka KHADC ka kwah ban don 35 ngut kiba shu shahjied ha ka ilekshon bad 2 ngut kiba shu shah thung ha u Lat, ha kaba iwei na ki ban shah thung dei napdeng ki kynthei.
Namarba u CEM u hap wanphai noh sha Jylla ba wan jngoh u Lat ïa ka KHADC ha ka Sngi Ba-ar, ka kynhun ki MDC ka KHADC ki ban donlang ha ka jingïakynduh bad u Amit Shah ki long u Chairman Bah Lamphrang Blah, u EM Bah Fantin J Lakadong, u nongïalam ka Liang Pyrshah u Bah Titosstarwell Chyne bd u MDC Bah Balajied Rani.
