Shillong, Naitung 22
Ka khubor kaba la ïohlum na ka ‘website’ ki pulit ka jylla ha ka Lah Sngi U Blei ka ïathuh ba kawei ka briew na Eastern West Khasi Hills ka la ujor hadien ba ka la ïoh pdiang ïa ka jingkhot sngewbha na ka kompani kaba kyrteng ka ‘PSA Group’ ban ïasnoh da kaba bei tyngka, ka la bei T. 18,000. Hynrei hadien ka la sngewthuh ba ka la shah shukor.
Ha kawei pat ka jingjia, ki pulit ki la ong ba u Mayadur Islam u la ujor ba ha ka 11 tarik Naitung ha ka por kumba 4:30 mynstep, ki para nongtrei jong u ki la tuh ïa kawei ka Mobile Phone bad ka pisa T. 95,000 na ka jaka trei ha JN Stadium, Polo, Shillong.
Nalorkata, ki pulit ki la ong ba u Khrawpyrkhat Paliar u la ujor ba ha ka 20 tarik Jymmang, ki runar ki bym lah ban ithuh ki la tuh ïa ki tiar ki tar na ka jaka ba la buh ïa u Mobile Tower ha Rajaju, West Khasi Hills, bad kine ki mar ki shongdor kumba T. 1,20,801.
Shuh shuh ki pulit ki la ïathuh ba kawei ka longkmie ka la ujor ba ha ka 13 tarik Naitung ha ka por kumba 7:30 janmiet, ki runar ki la shoh la dat ïa u para jong ka ha ka thaiñ Masangpani kaba hap ha thanat Phulbari, West Garo Hills. Une uba la shah shoh u la mynsaw bad la pynkit ïa u sha CHC Phulbari ban ïoh jingsumar.
