Shillong, Naitung 22
Ki la don palat 140 ngut ki nong Meghalaya kiba la wanphai na Bangla-desh sha Jylla lajong haduh mynta ha kaba kham bun ki la wan rung lyngba ka Dawki kaba don ha khappud bad ka Bangladesh.
Ka jingwanphai ki nongshong shnong ka Meghalaya na Bangla-desh ka dei hadien ba la jia ka jingïakynad bad umsnam kaba shyrkhei tang namar ka bhah thungkam Sorkar.
Katkum ka jingkheiñ halor ka jingdon ki nong Meghalaya kiba la wanphai sha Jylla ha kine ki khyndiat sngi haduh mynta, ki long kumba 141 ngut, ha kaba kham bun ki dei ki samla pule.
Kiba wanphai lyngba ka khappud jong ka Jylla Tripura ki long 40 ngut bad kiba wan lyngba ka liengsuiñ na Bangladesh sha Kolkata ki long 7 ngut.
Kiba bun kiwei pat kiba la wanphai ki dei kiba wan rung lyngba ka ICP Dawki.
Ka tnat Bar Ri jong ka India ka la ai jingkheiñ ba ki don palat 4,500 ngut ki samla pule na India kiba la wanphai noh na Bangladesh namar kane ka jingjia.
Kumba ka long mynta, ka jingïakhih ka la sdang jai-jai namar haduh ka step Lah Sngi U Blei ym shym la don kino-kino ki jingjia ba kham shyrkhei wat la ka jingpynjari ïa ka korphiw ka dang bteng.
Ha ka 21 tarik, ka Supreme Court jong ka ri Bangladesh ka la pynkylla biang da kaba pynmih ïa ka hukum kaba ong ba 93% na ki kam Sorkar dei ban bhah halor ka nongrim jong ka jinglah (merit) ym shuh ban don ka bhah kaba 56% kaba kynthup ïa kiba dei na ki longïing jong ki nongïaleh laitluid ha ka thma 1971, ïa ki kynthei, bad kiba dei na ki jaka ba dang shadien.
