Jowai, Naitung:
Ka District Legal Services Authority, West Jaiñtia Hills District ha ka 20 tarik Naitung ka la pynlong ïa ka prokram pynsngewthuh paidbah halor ka phang “Environmental Protection with a Special Focus on Solid Waste Management” ne ka jingïada ïa ka mariang da kaba pynleit jingmut kyrpang ïa ki jaboh jabaiñ.
Ïa ka jingïalang la pynlong ha Conference Hall jong ka District and Sessions Court, Khliehtyrshi ha ka jingdonlang u kongsan Justice H.S. Thangkhiew, u nongbishar jong ka ïingbishar ka Jylla bad Executive Chairman ka MSLSA lem bad u Justice W. Diengdoh, u nongbishar jong ka ïingbishar ka Jylla bad Chairman ka HCLSC kum u symbud kongsan.
Ha kane ka jingïalang u kongsan ryngkat bad kiwei-kiwei ki ‘riew pawkhmat ki la sam ïa ki ‘cheque’ sha 144 ngut ki nongïoh jingmyntoi na ka thaiñ Saphai na ka bynta ki mukotduma shim jaka ba la dep pynbeit.
Ka jingsiew bai lutksan ba la pynbeit da ka NEEPCO, Shillong, ha kaba ïadei bad baroh 144 tylli ki mukotduma shim jaka ka long T.1,03,08,108.50.
Kane ka jingpynbeit ka long halor ka hukum ba la pynmih ha ka 02-06-2023, ba la mynjur da u N.A. Khan, Special Judicial Officer (Land Acquisition), West Jaiñtia Hills District, Jowai katkum ka L.A. No26/2015.
Ïa ki 144 tylli ki mukotduma la pynbeit da ka jingsiew bai lutksan kaba la pynkiew (enhanced compensation amount) kaba heh da 50% ïa ka pisa kaba la siew mynshwa da ka NEEPCO, Shillong.
U Kongsan, Justice H.S. Thangkhiew ha ka jingkren u la pynpaw ïa ka jingkmen ban ïadonlang ha kane ka prokram bad u la ban jur ïa ka jingdonkam jong kum kine ki prokram. U la ong ba kane ka prokram ka kren shaphang ar tylli ki bynta, kata ka jingpynïaid ïa ka mariang bad ka jingpynkut noh ba la slem bha kiba dei bad ka jingshim jaka.
“Ka khyndew ka dei ka jingdon jingem kaba neh bad kaba kordor bha ïa ki briew, bad ka jingkiew dor bad ka jingbanbor kaba nangjur na ka bynta ban ïoh jaka puta. Ka aiñ kaba rim kam shym la pynleit jingmut bha ïa kine ki mat, hynrei la lah ban pynbeit ha ki aiñ kiba thymmai,” u la ong.
U la ban jur halor ka jingdonkam ban pynbeit ha ka por kaba biang ban lait na ka jinghiar dor jong ka bai lutksan katba nangïaid ki sngi ki por.
U Justice Thangkhiew u la ai ka jingïaroh ruh ïa ka District Legal Services Authority kaba la pynlong ïa kane ka prokram bad u la pynpaw ïa ka jingdonkam ban pynbeit shabar jong ka ïingbishar lyngba ka jingïapynbeit bad jingïakren.
U la pynpaw ïa ka jingkyrmen ba yn sa pynbeit shuh-shuh ïa ki mukotduma ha kane ka rukom bad ba ki mat ba la pynshong nongrim ki lah ban ym wan sha ka ïingbishar.
Halor ka phang kaba ïadei bad ka jingpynneh pynsah mariang, u Justice Thangkhiew u la kdew ïa ka jingkiew ha ki kam pynshai paidbah halor ki bynta kiba ïadei bad ka mariang.
U la kdew ïa ka jingdonkam jong ka jingpynïaid ïa ki jaboh jabaiñ, khamtam ha ki jaka lum kum ha Jowai, ha kaba ka prokram ka long kaba ïadei bha.
U la ong ka sor Jowai ka la mad ïa ki jingeh ha kaba ïadei bad ki sienjam ban shim halor ki jaboh jabaiñ bad kane ka prokram ka dei kaba biang bha namar ba ka pynbeit ym tang ïa ka jingeh jong ka jingpyndonkam ïa ki jaboh jabaiñ hynrei wat ïa ki jingeh kiba kyrpang kiba ki jaka lum ki ïakynduh.
Katba u Symbud Kongsan u Justice W. Diengdoh, nongbishar ka ïingbishar ka Jylla bad Chairman ka HCLSC ha ka jingkren u la ïathuh ïa ka jingshem jong u halor ka mukotduma shim jaka kaba la slem kaba dei naduh ka snem 2002. U la pynkynmaw ïa ka por jong u kum u ophisar bishar ba kyrpang uba pynïaid ïa kine ki kam bad u la pynpaw ïa ka jinglyngngoh ïa ka jinglong ba jylliew bad ka jingjlan jong ka mukotduma.
Hynrei u la sngewkmen ban ïohi ba ka mukotduma ka la kut noh hapdeng ka jingseisoh bad u la ai khublei ïa ka jingpyrshang jong baroh ki ophisar bishar kiba donkti, khamtam eh ïa u paralok jong u uba la pynkut ïa ka kam.
