Nongpoh, Naitung 22
Ki nongïalam jong ka Hynñiewtrep Youths’ Council (HYC) Ri Bhoi District ha ka Lah Sngi U Blei ki la pynlong ïa ka jingleit khynra ïa kawei ka kompani shna jri kaba la tip kyrteng kum ka Resource Rubber Private Limited (RRPL) kaba don ha Mawsmai, Ri Bhoi District hadien ka jingmih jingujor ba ka treikam beaiñ khlem ki kot ki sla kiba biang na ki bor ba dei khmih.
Ha kane ka jingkhynra, ka la don ruh ka jingïania kaba la jur la kum ban ïa kynrup bad ktah kti hapdeng ki dkhot jong ka seng bad uwei u bar jylla uba dei u trai jong katei ka kompani uba la pyrshang ban pyni bor ïa ki dkhot jong ka seng bad kyntait ruh ban pyni ïa ki kot ki sla. Utei u trai ka kompani u dei ba la tip kyrteng kum u Joginder Pal Kapoor.
Ha kane ka jingleit khynra ïa kane ka kompani la don lang ryngkat u trai jong katei ka jaka u Bah Donald Rymbai uba la kynnoh ba katei ka kompani ka la shu trei beaiñ ha ka jaka ka jong u khlem da siew ïa ka bai wai mynta la kumba ar snem eiei. U Bah Donald Rymbai u la pyntip ruh ba ka laisen khaïi (Trading License) jong katei ka kompani ka la dep ban kut naduh u bnai Lber mynta u snem, hynrei la pyntrei beaiñ wat hadien kiba bun ki jingujor kiba u la leit ban buh sha ka KHADC bad u Deputy Commissioner barim jong ka Ri Bhoi ruh kumjuh.
Katba u Bah Tony Shylla, General Secretary ka HYC Ri Bhoi District u la ïathuh ba kane ka jingleit khynra jong ka seng, ka dei hadien ba ka la ïoh ïa ka jingtip kaba shai ba katei ka kompani ka la pyntrei beaiñ ha katei ka jaka khlem ki kot ki sla kiba biang. U la kynnoh ba utei bar jylla ha katei ka kompani, u khlem kheiñ snep satia ïa ki trai jaka bad ki nongshong shnong ka bri u hynñiewtrep da kaba pyn ibor bad kyntait ban pyni ïa ki kot ki sla kiba la pan da ka seng.
Ha kane ka sngi, na ka liang ka HYC Ri Bhoi ka la khang tala syndon ïa katei ka kompani bad byrngem ruh ba kam dei ban plie nangne shakhmat katba kam pat don ïa ki kot ki sla kiba biang, lym kumta ka seng kan sa shim pat da kiwei ki sienjam kiba tyngeh nangne shakhmat.
