Shillong, Naitung 22
U Chief Executive Member (CEM) ka Khasi Hills Autonomous District Council (KHADC), u Bah Pynïaid Sing Syiem u la shah bynshet kum u Convener jong baroh 10 tylli ki Autonomous District Council (ADC) ban pynïaid ïa ki jingïakynduh ban ïakren ïa ki mat kiba dei na ka bynta ban pynkhlaiñ shuh shuh ïa ki ADC ha ka Thaiñ Shatei Lam Mihngi.
U Bah Pynïaid u la shahjied kum u Convener ha ka jingïakynduh lang jong ki CEM bad nongmihkhmat kiba dei na ki ADC ka Thaiñ Shatei Lam Mihngi kaba la long ha Delhi ha ka Lah Sngi U Blei.
Ki CEM jong ki ADC na Assam, Meghalaya, Tripura bad Mizoram ki la ïashimbynta lang ha kane ka jingïalang ha New Delhi kaba la pynïaid da u CEM ka Bodoland Territorial Council (BTC), u Promod Boro lem bad u nongïalam ka The Indigenous Progressive Regional Alliance (TIPRA), u Pradyot Debbarman.
Ki CEM bad MDC jong 10 tylli ki ADC ki la ïakynduh ha New Delhi naduh ka Sngi Saitjaiñ ha kaba la ïakren bad shim rai ban kyrpad biang ïa ka Sorkar Pdeng ban wanrah noh ïa ka aiñ kaba ïadei bad ka jingpynkylla ïa ka Sixth Schedule ha kane ka dorbar lyiur jong ka Parliament.
La ïakren ruh ïa ki jingeh kiba ïakynduh ha la kijong kijong ki ADC nalor ka jingdonkam ban wanrah ïa ki aiñ ban ïada ïa ki paid riewlum ha ka Thaiñ Shatei Lam Mihngi.
La rai ruh ban bynshet ha u Bah Pynïaid ban lum sa kawei ka jingïakynduh lang ka ban sa long ha nongbah Shillong ha u bnai ban wan (Nailur).
