Shillong, Naitung 22
Ka khubor ba la ïohlum na ka ‘website’ ki pulit ka jylla ha ka Lah Sngi U Blei ka ïathuh ba u Medical Superintendent ka Woodland Hospital, Jowai, u la ujor ba ha ka 17 tarik Naitung ha ka por kumba 11 baje mynmiet, uwei u nongthiah pang ha kane ka jaka sumar, ïa uba la tip kyrteng kum u Chekuri Subba Rao ba la ju khot sin kum u Suresh, 34 snem ka rta, u la pynmih huri-hura bad thaw kajia bad ki nongtrei jong kane ka jaka sumar bad kumjuh ruh bad kiwei pat ki nongthiah pang.
Nalorkata, u Medical Superintendent u la ujor ruh ba ha ka sngi kaba bud, kata, ka 18 tarik Naitung ha ka por kumba 10:15 mynstep, utei u juh u briew, u Chekuri Subba Rao, uba la don hapdeng ka jingbuaid kyiad, u la shoh ïa uwei na ki nongsumar jong katei ka Hospital.
Namar jong kane ka jingshah shoh, utei u nongsumar u la mynsaw malu-mala, la ong ki pulit.
