Shillong, Naitung 22
U Bah Isaac Basaïawmoit uba dei Secretary ka Hynñiewtrep Youths’ Council (HYC) sengkmie, ha ka 22 tarik u Naitung kaba dei ruh ka sien ba ar u la shah khot hajir biang ha ki pulit ka thanat Sadar, Shillong ha kaba ïadei bad ka jingleit pynpra jong ka seng ïa ki jaka sah beaiñ jong ki briew ha Lum Survey.
Kum ban shu kdew hangne, ki pulit ka thanat Sadar ki la dep ban khot hajir naduh u President ka seng, Bah Roy Kupar Synrem, Vice-President, Bah Donboklang Kharlyngdoh bad u Secretary, Bah Isaac Basaïawmoit.
Haba ai jingkren sha ki lad pathai khubor hadien ba la mih na thanat, u Bah Isaac u la ong ba ka jingshah khot hajir jong u ka long kumjuh kumba shah khot hajir u Vice-President ka seng, u Bah Donboklang Kharlyngdoh kaba la jia dang ha kine ki khyndiat sngi kiba la dep. Ka daw kaba kine ki nongïalam ka seng ki la shah khot hajir ka long halor ka jingshim jingkylli ha kaba ïadei bad ka jingleit khynra ka seng ïa ki poiwir kiba sah beaiñ ha Lum Survey.
U la ïathuh ba ki pulit ki la pynngat ïa u haduh 10 tylli ki kyndon bad 3 tylli ki mukotduma ha kaba 2 tylli ki mukotduma ki dei na thanat Sadar bad kawei pat ka mukotduma ka dei na ka thanat Laitumkhrah.
U la ong ruh ba um sngewphylla shuh ïa kane ka jingshah khot hajir ha ki pulit namar ka la long na ka por sha ka por bad kum ka seng ruh ka la leh ïa ki kam kiba bha ym ki kam kiba sniew.
“Na ka liang jong nga bad jong ka seng, ngim sngewphylla shuh ïa kane ka jingshah khot ban wan hajir namar ngi la long myllen, kawei ruh ngi leh ïa kaba bha bad lada ki khot ruh, ngi long kiba kloi ban wan namar ngi khlem leh ïa kano-kano kaba sniew”, la ong u Bah Isaac.
Ha kaba ïadei bad ka jingkhynra drok jong ka seng, u Bah Basaïawmoit u la ong na ka liang ka seng kan ïai bteng ban khynra drok beit nangne shakhmat ruh.
Shuh shuh u Bah Basaïawmoit u la ong na ka liang ka seng kan ïai buddien ha kaba ïadei bad ka jaka kaba don ha Lum Survey bad katkum ba ïoh jingtip ka seng, kitei ki poiwir kiba shong ba sah ha katei ka jaka, ki la mih noh napoh ka jylla bad ki don ruh pat kiba dang don hapoh ka jylla.
U Bah Basaïawmoit u la ong ba um tip satia la hato ki pulit kin dang ïai khot hajir ne em ïa u lem bad ki nongïalam ka seng nangne shakhmat.
“Ïa kata ngam pat nang ban batai, tip ïoh ki dang sngewtynnad kin khot biang hi ban wan ïakynduh lada ki kwah ban ïakynduh”, la ong u Bah Basaïawmoit.
