Shillong, Naitung 23
Ka Sorkar Jylla ka la pynpaw ka jingaikhublei ïa ka Myntri ka tnad kam pla tyngka ka Sorkar Pdeng, ka Nirmala Sitharaman kaba la wanrah ïa ka Mang Tyngka ka ban kyntiew ïa ka jingmanbha da kaba pynleit jingmut kyrpang halor ka jingthaw ïa ki kam ki jam bad ka ‘Skill Development’ kiba tawiar sawdong ïa saw tylli ki kyrdan – Garib (baduk), Mahilayen (kynthei), Yuva (samla) bad Annadata (nongrep).
“Ki khyndai tylli ki mat ba hakhmat eh jong ka Mang Tyngka – ka rep ka riang kaba seisoh bad kaba khlaiñ, ka kam ka jam bad ka sap ka phong, ka roi ka kiew ha ki jaka sor, ki jingtei, ki buit thymmai nalor kiwei-kiwei ki ïa beit laiñ bad ka ‘Mission 10’ jong ka Meghalaya bad kan pynbiang ïa ka jingdonkam ban ai mynsiem haba phai sha ka jingkiew jong ka Jylla,” la ong ka kyrwoh na u Joint Secretary ka tnad pla tyngka (Budget) ka Sorkar Jylla.
Ka kyrwoh ka ong ruh ba ka jingkyntiew ha ka jingpynlut haba ïadei bad ka ‘Special Assistance’ sha ki Jylla na bynta ki ‘Capital Investment’ kaba pynbiang ïa ka ram ka bym donkam siew sut kaba 50 snem – na ka T.1.3 lak klur sha ka T.1.5 lak klur ha kane ka Mang Tyngka ka dei ka roi ka kiew kaba manbha na bynta ka Meghalaya bad kan nang pynsted ïa ka roi ka kiew ha ki kam tei jingtei hapoh ka Jylla. Ka kyrwoh ka ong ruh ha u snem 2023-24, ka Jylla ka la pyndonkam palat T.1300 klur lyngba kane ka skhim.
Ha kajuh ka por, ka kyrwoh ka kdew ba ki sienjam ba la pynbna na bynta ki nongtrei ba dang sdang trei ha ka sien banyngkong (ka tulop ba shi bnai haduh T.15,000 ha ki 3 tylli ki sien siew lyngba ka DBT) katkum ka jingpynrung kyrteng ha ka EPFO lah ban kynthup lang bad ka Meghalaya Industrial & Investment Promotion Policy, 2024 ban pyntikna ïa ka roi ka kiew ha ki kam karkhana bad ka jingpynsted ban thaw ïa ki kam hapoh ka Jylla.
Naba ka Mang Tyngka ka la pynbna halor ki ‘Industrial Park’ ha ki 100 tylli ki jaka sor, ka Meghalaya kan shim kabu ïa kane ban thaw ïa ki ‘Industrial Park’ kiba paka tam hapoh ka Jylla.
Ha kajuh ka por, ka kyrwoh ka ong ruh ba yn shim kabu halor ka skhim Pradhan Mantri Janjatiya Unnat Gram Abhiyan ban pyndonkam hok ïa baroh ki skhim hapoh ka Jylla. Baroh ki shnong hapoh ka Jylla kin shah kynthup lang hapoh kane ka prokram.
Halor ka bynta ba ïadei bad ka jingpynïeng ïa 100 tylli ki shnat treikam hapoh ka thaiñ Shatei Lam Mihngi da ka Indian Post bad jaka kynshew, ka kyrwoh ka la ong ba kane kan nang pynbha ïa ki kam ba ïadei bad ki jaka kynshew hapoh ka Jylla.
Shuh shuh ka skhim ‘Internship’ ba shi snem ha ka Mang Tyngka kan ïarap shi kat dei ïa ki nongwad kam ban ïoh ïa ka jingshemphang ha ka kam na ki kompeni ba-heh. Ki ‘Intern’ kin ïoh ruh ïa ka jingsiew kaba T.5,000 shi bnai na bynta shi snem bad ka jingsiew kaba shisien siew kaba T.6,000.
Nalor ka jingmang kylluid haba ïadei bad ka skhim shna ïing – PMAY – Grameen & Urban, ka jingkyntiew ban pynleit jingmut ha ka liang ka rep ka riang khamtam ha ka rep ka riang ka bym pyndonkam dawai kan ïarap ïa ka Jylla naba ka Meghalaya ka long kawei na ki Jylla ban ting ïa ka rep ka riang ka bym ai dawai hapoh ka thaiñ Shatei Lam Mihngi.
